Бокс • 05 Сәуір, 2022

Халықаралық жарыстарға қатысып жатыр

21 рет көрсетілді

Бокстан Қазақстан ұлттық құрамасы қыркүйек айында Қытайдың Ханчжоу қаласында өтетін жазғы Азия ойындарына дайындық ретінде бірнеше халықаралық турнирде бақ сынап, шеберліктерін шыңдап жатыр. Мәселен, ұлттық құраманың екінші нөмірлі боксшылары Сербия астанасы – Белградта мәресіне жеткен турнирде өнер көрсетіп келсе, негізгі құрам боксшылары осы күндері Таиландта басталған халықаралық жарыста бақ сынауда.

Сербиядағы жарыста ел намысын былтырғы әлем чемпионы Теміртас Жүсіпов, ел біріншілігінің жеңімпазы мен жүлдегерлері Даниял Сәбит, Олжас Байниязов, Саматәлі Төлтаев және ересектер арасына енді қосылып жатқан бірқатар жас боксшы қорғады. Турнирге қа­тысқан боксшылардың азды­ғына байланысты іріктеу кезең­дерінде жерлестеріміз бір-біріне қарсылас атанып, финалға дейін жігіттердің қатары сиреп қалды. Атап айтқанда, 51 килода жұдырықтасқан Даниял Сәбит алғашқы айналымда Кенже Мұратұлын 4:1 есебімен жеңсе, 60 килодағы Саматәлі Төлтаев Бекзат Мағжанды 5:0 нәтижесімен айқын ұтты. Ал Ермахан Жақпеков (71 кило), Диас Молжігітов (75 кило), Ерасыл Жақпеков (80 кило), Ерхат Бекзат (92 кило) және ауыр салмақтағы Дамир Тойбай бірінші кезеңде-ақ қарсыластарынан жеңіліп, жарысты ерте аяқтауға мәжбүр болды.

Қорытындысында финалға үш-ақ боксшымыз шығып, оның тек біреуі ғана турнир чемпионы атанды. Оның өзінде 63,5 килода өнер көрсеткен Мұхамедсабыр Базарбайұлының финалдағы қарсыласы марокколық Әбделхак Надир рингке шықпай қойып, жерлесіміз жекпе-жексіз бас жүлдені еншіледі. Өкінішке қарай, 54 килода бақ сынаған Олжас Байниязов пен 75 килодағы Ілияр Әшіров финалда жарыс қожайыны сербиялық боксшылардан жеңіліп, күміс медальды қанағат тұтты. Бұл жарыста жер­лестеріміз жалпы саны 12 жүлде жеңіп алды.

Ал негізгі құрам боксшылары қатысып жатқан Таиландтағы турнирде Қазақстан ұлттық құрамасының 11 боксшысы өнер көрсетуде. Бұл жақта да жеребе нәтижесі бойынша жерлестеріміз жарыстың алғашқы күнінен бас­тап бір-бірімен шаршы алаңда кездесті. Мәселен, әлем чемпио­ны, Олимпиаданың қола жүл­дегері Сәкен Бибосынов алғашқы кез­десуінде жастар арасындағы әлем чемпионы отандасымыз Санжар Тәшкенбаймен кездесіп, төрешілердің бірауыздан шы­ғарған шешімімен жеңіске жетті. С.Бибосынов ширек финалда шаршы алаң иесі таиландтық Танарат Саенфетпен кездеседі.

Сонымен қатар 2021 жылғы әлем чемпионатының күміс жүл­дегері Серік Теміржанов та ал­ғашқы жекпе-жегін сәтті бас­тады. 57 кило салмақта сынға түс­кен боксшы бірін­ші айналымда филиппиндік Ма­рио Фернандестен айласын асырды. Енді ол жартылай фи­налға жолдама беретін айқаста син­гапурлік Мохамед Ханурдин Бин Хамидпен жұды­рық­тасады. 75 килодағы Аятолла Тәкі­жанов  ал­ғашқы айқасын таиланд­тық бокс­шы Ситиксак Чумку­мар­номмен өткізіп, қарсыласын еш қиын­дық­сыз тізе бүктірді. Ол келесі кезең­де алаң қожайыны Борворн Кадамованмен күш сынасады. 

2018 жылғы жастар ара­сын­дағы әлем чемпионы Нұрбек Оралбай (80 кило) Thailand Open ха­лықаралық турнирінде мер­зімі­нен бұрын жүлдегер атанды. Же­ребеге сәйкес отандасымыз ә д­е­геннен жарыстың жартылай фи­налына жолдама алды. Отан­дасы­мыз финал жолдамасын жаңа­­­зеландиялық Оникс Ли мен таи­­ланд­тық Анават Тонгкаток жұ­бы­ның жеңімпазымен сарапқа салады.

Жоғарыдағы боксшылардан бөлек аталған жарыста Олимпиада бағдарламасына енген салмақ дәрежесі бойынша Санатәлі Төлтаев, Сұлтан Мусинов (63,5 кило), Асланбек Шымбергенов (69 кило), Тимур Нұрсейітов (75 ки­ло), Айбек Оралбай, Сағындық Тоғам­бай (91 кило) бақ сынайды. Таиландтың Пхукет қаласында өтіп жатқан халықаралық турнир 10 сәуірге дейін жалғасады.

Соңғы жаңалықтар

Алматыда троллейбус өртенді

Оқиға • 24 Маусым, 2022

ТүркПА-ның атауы өзгереді

Парламент • 24 Маусым, 2022

Ұқсас жаңалықтар