Балықшылардың көптеген өтініші бойынша 2021 жылдың мамыр айында «Бурабай» ұлттық паркінің қызметкерлері ережеге өзгерістер енгізуге бастамашы болды. Содан кейін ведомстволарда бекітулер болып, сыбайлас жемқорлыққа қарсы сараптаманың қорытындысын алу, құқықтық актілерді пайдаланушылардың қоғамдық онлайн талқылауын өткізу мен сараптамалық кеңестің қорытындысын алу қажет болды. Мұны бірінші болып Бурабай ұлттық паркінің қызметкерлері енгізіп, бүгінде олардың тәжірибесіне өзге ұлттық саябақтағы әріптестер де қызығушылық танытуда.
Қорғалжын мемлекеттік қорығының тұсаукесер орталығында Орман шаруашылығы және жануарлар дүниесі комитеті «Ерекше қорғалатын табиғи аумақтардың су қоймаларында балық және басқа да су жануарларын спорттық, әуесқойлық және мелиоративтік аулауды реттеу мәселелері» атты семинар ұйымдастырды.
«Бурабай» мемлекеттік ұлттық паркінің бас орманшысы Бауыржан Махметов әріптестерін жаңа трендпен таныстырды. Ол ережеге енгізілген өзгерістерді үйлестіру алгоритмі, мемлекеттік органдармен өзара іс-қимыл туралы айтты. Сондай-ақ ұлттық саябақтың сайтында балық аулауға рұқсаттарды электронды түрде рәсімдейтін платформа қалай жұмыс істейтінін көрсетті.
Рұқсат қағазын онлайн сатып алу өте оңай, parkburabay.kz сайтындағы «Онлайн спорттық балық аулау» бөліміне кіріп, «Онлайн билет сатып алу» сілтемесіндегі форманы толтыру қажет. Төлем жасайсыз да, балық аулауға барасыз.
