Scalerator бағдарламасының алғашқы легіне қатысқан компаниялар нарықтың белді ойыншыларына айналды. Бүгінде олар Канада, АҚШ, Кипр, Үндістан, Вьетнам, Сингапур, Малайзия, Сауд Арабиясы, Қытай, Өзбекстан, Қырғызстан, Украина, Беларусь нарықтарындағы серіктестермен белсенді түрде келіссөздер жүргізіп, келісімшарттар жасасуда.
Мәселен, бағдарламаның былтырғы қатысушыларының бірі Akhter Studio компаниясы Солтүстік Америка мен Еуропа нарықтарына шығып, бақ сынап көруді жөн көрді. Сөйтіп, акселерация барысында АҚШ компаниясымен 48 мың долларға келісімшарт жасасты.
– Акселерациядан кейін компанияның штаты 30 адамнан 50 адамға дейін көбейді. Компанияның орташа айлық қаржы айналымы төрт есе өсті. Аталған көрсеткіштерді тағы да екі есе арттыруға мүмкіндігіміз бар. Бағдарлама менторларының арқасында customer success процесін дұрыс үйлестіруді және АҚШ нарығымен сапалы коммуникация жасаудың тетіктерін үйрендік, – дейді Akhter Studio компаниясының басшысы Адмет Ахтер.
Бағдарламаның тағы бір қатысушысы – Zapis.kz компаниясы өзбекстандық және қырғызстандық серіктестерімен келісімшартқа отырды. Zapis.kz – сұлулық салондарына онлайн жазылуға арналған маркетплейс. Бүгінде компания Вьетнам мен БАӘ нарығына шығуға дайындалып жатыр. 2021 жылы платформа қолданушылары бьюти-қызмет алу үшін 4,5 млн рет жазылған.
Дегенмен экожүйеге қатысушылармен жүргізілген кері байланыстың нәтижесінде біршама кемшілік анықталды. Әлеуетті стартаптардың көбі сараптамалық сүйемелдеудің жоқтығынан шетел нарығына шығу мүмкіндігінен айырылған. Яғни алдағы қадамдарға дайын болмай шыққан. Бағы жанып бағдарламаға өткендердің де белгілі бір қиындықтармен бетпе-бет келетіні мәлім. Мәселен, қатысушылар өнімді нарықтың ерекшеліктеріне бейімдеуге үлгермеген, яғни уақытты жеткізе алмаған. Кейбір командалардың жұмыс ауқымын ұлғайтуға дайын болмай шыққаны анықталды. Сондықтан Astana Hub технопаркі PreScalerator бағдарламасын әзірлеп шықты.
Scalerator-дың PreScalerator бағдарламасынан қандай айырмашылығы бар? Біріншіден, қатысушылар теориялық мол білім алады. Ал Accelerator оқытуға емес, көбінесе тәжірибеге басымдық береді. Екіншіден, PreScalerator-да сарапшылар жобаның мақсатын, өнімнің ерекшелігін анықтауға және нарықты талдауға көмектеседі. Өнімді белгілі бір аймақтың ерекшеліктеріне қалай бейімдеуге үйретеді. Үшіншіден, IT-саланың көрнекті өкілдерімен жақсы байланыстарды орнату мүмкіндігі туындайды.
Ең бастысы, PreScalerator-дың көмегімен қажетті теориялық базаны толық меңгерген әр қатысушы тәжірибе ауылына ойысады. Сондай-ақ өз өнімін шетелге шығаруға мүмкіндік беретін негізгі бағдарлама – Scalerator арқылы компанияны масштабтауға әзір тұрады.
