Аталған жарыстың қарсаңында белгілі меценат Берік Қаниев: «Дарынды жастарды қолдау және саламатты өмір салтын насихаттау мақсатында еліміздің екі қаласында шахматтан ірі турнир ұйымдастыруды құп көрдік. Осындай ауқымды шараның өтуіне мұрындық болған Fizmat Endowment Fund қоры мен Қазақстан шахмат федерациясына айтар алғысымыз зор. Олардың өскелең ұрпаққа барынша қолдау көрсетіп отырғаны қуантады. Күні кеше ғана ұйымдастырушылар жарыстың жүлде қоры 2 млн теңгені құрайтынын жария етті. Сонымен қатар РФММ білім беру үшін төрт білім грантын бөледі. Білімге инвестиция салу жастар үшін ең керемет сыйлық екені сөзсіз. Осындай іс-шаралар оқушыларымызды жаңа жеңістерге итермелеп, таланттарын аша түсетініне кәміл сенемін. Барша қатысушыларға сәттілік тілеймін», деді.
