![Сайлау жүйесін жетілдіруге қатысты ұсыныстар айтылды](/media/2022/04/12/11-04-foto_egemen_kazakhstan_dsc_4632.jpg)
Кездесуге Мемлекет басшысының наурыздағы Қазақстан халқына Жолдауында айтылған сайлау процесін жаңғырту жөніндегі бастамаларын түсіндіру және талқылау арқау болды. Жиынға қатысушылар маңызды құжатта ұсынылған тың бастамаларды оң бағалап, өкілдік билік органдарын сайлаудағы аралас сайлау жүйесіне баса назар аударды. Олардың пікірінше, алдағы уақытта Мәжіліс депутаттары санының жартысы мажоритарлық принцип бойынша сайлануға тиіс. Басқосуда облыс әкімдерінің сайланбалылығын енгізу, сайлау жарнасын төмендету, депутаттыққа кандидаттар үшін салық декларацияларын тапсыру рәсімдерін қайта қарау және мүмкіндігі шектеулі жандарды ілгерілету туралы ұсыныстар алға тартылды.
Сонымен қатар кездесуде сайлау комиссияларын құру және олардың қызметі, бақылаушылардың құқықтары мен өкілеттіктерінің сақталуы, оларды жүйелі түрде оқыту, сайлау учаскелерін бейнебақылау камераларымен жабдықтау мәселелері қозғалды. Мазмұнды әрі белсенді түрде өткен пікірталас кезінде балама ұсыныстар мен пікірлер де айтылды.
Сайлау процесіндегі Еxit poll рөлі, сондай-ақ осы рәсімді тәуелсіз қоғамдық ұйымдардың қатысуымен өткізу мүмкіндігі сөз болды. Осы мәселені көтеріп, сөз алғандар мұндай сауалнаманы жүргізу сайлаушылардың саяси мәдениетін арттырып, сайлаудың ашықтығын қамтамасыз ететіндігін алға тартты.
Өңірдегі іссапардың маңызды бөлігі студенттер және жастар ұйымдарының өкілдерімен кездесу болды. Еркін диалог форматында өткен басқосуда электронды дауыс беру жүйесін енгізу, оның басымдықтары мен кемшіліктері сынды мәселелер талқыға түсті. Жастардың көпшілігі электронды дауыс берудің тиімділігі мен қарапайымдылығын атап өтсе, өзгелері бұл жүйеге қатысты бірқатар қауіп-қатер бар екенін айтты.
Келелі жиында жастар аудиториясы сайлау процесінің өзекті тақырыптары бойынша өткізілген онлайн сауалдамаға қатысты. Сауалдама нәтижелері респонденттердің 43,8%-ы – электронды, 42,9%-ы аралас дауыс беру жүйесін енгізуді қолдайтынын көрсетті. Сондай-ақ респонденттердің 68,8%-ы Президенттікке кандидат мемлекеттік тілді білуге тиіс және лингвистикалық емтихан тапсыру міндетті деп санайды. Ал сауалнамаға қатысушылардың 61,6%-ы соттылығы бар азаматты Президент, депутат, әкім секілді сайланбалы лауазымдарға ұсынуға жол беруге болмайды деп санайды.
Өңір жастарымен өткен кездесу соңында Н.Әбдіров оларға мазмұнды әрі тартымды диалог үшін алғыс айтып, Жаңа Қазақстанды құруға белсенді қатысуға шақырды.
Сапар аясында ОСК төрағасы Теректі ауданына қарасты Подстепное ауылдық округінің тұрғындарымен және осы ауылдың 2021 жылғы 25 шілдеде сайланған әкімі Сержан Мәдиевпен кездесті. Кездесуде ауыл әкімі өзінің сайлауға қатысу тәжірибесімен бөлісті. Ауыл тұрғындары елді мекенде өткен сайлауды және өздері сайлаған әкімнің жұмысын оң бағалайтындарын жеткізді.
Ауыл әкімі лауазымына кандидаттардың барлығы қатысқан пікір алмасу барысында ашық дебат өткізу, осы лауазымға кандидаттардың міндетті түрде жоғары білімдерінің болуы және заңды білу қажеттігі туралы мәселелер де қозғалды.
ОСК төрағасының Батыс Қазақстан облысының жұртшылығымен кездесулері басқа өңірлердегі сияқты әлеуметтік желілерде трансляция режімінде көрсетілді. Н.Әбдіровтің келесі жұмыс сапары Семей қаласына жоспарланып отыр.