Чемпионды тұғырдан тайдырды

Бесінші турдың орталық ойы­ны Ал­матыдағы «Орталық» стадионда жергілікті «Қайрат» пен Ақтаудың «Каспий» клубтары арасында өтті. Кейінгі екі турда қарсыластарымен тең түсіп, төрт ұпайынан айырылған Құр­бан Бердыев шәкірттері турнир кестесіндегі жағдайын жақсарту үшін бұл матчта қалайда «те­ңізшілерден» ұпай алуға тиіс болатын. Ал қатарынан екі турда жеңіске жеткен «Каспийге» де ұпай жоғалту тиімсіз болатын. Алайда Ни­колай Костов шәкірттері тең дә­режеде өткен ойында 0:1 есебімен жеңіліп қалды. Ойынның 14-минутында чемпионаттың қазіргі үздік сұрмергені Хосе Канте мергендігімен көзге түсіп, есеп ашты. Бірақ қапталдағы төреші гвинеялық шабуылшы ойыннан тыс қалғанын бас төрешіге ескертіп, голды есептемей тастады. Дегенмен тайм аяқ­талар тұста Жоао Пауло жеке шеберлігінің арқасында «Кас­пийдің» қақпасына гол соғып, командасына маңызды 3 ұпай сыйлады. Сөйтіп, Құрбан Бердыевтың командасы турнир кестесінде бірінші орынға шықты. «Каспий» матч бойы допқа иелік еткенімен, қауіпті шабуыл, гол соғатын мүмкіндіктер бойынша «Қайраттан» қалып қойды.

Бесінші турдың басты сенсациясы Шымкенттегі «Ордабасы» мен «Тобыл» арасындағы матч­та тіркелді. Төрт тур қатарынан жеңілістің не екенін білмей келе жатқан былтырғы ел чемпион­дары күтпеген жерде бірін­ші­ліктің ортаңқол командасынан жеңіліп қалды – 3:1. Таблодағы нәтиженің көрінісіне 14-минутта «Тобыл» қорғаушысы Александр Марочкиннің алаңнан қуылуы қатты әсер етті. Қақпаға еніп бара жатқан допты әдейі қолымен қай­тарғаны үшін бас төреші Ма­рочкинге бірден «қызыл қағаз» көрсетіп, «Тобыл» қақпасына пе­нальти белгіледі. 11 метрлік нүктеде Эльхан Астанов мүлт кеткен жоқ – 1:0. 41-минутта Игорь Сергеев таразы басын теңес­тіргенімен, 45-минутта «Орда­басының» тоголық шабуылшысы Серж Ньюиадзи командасын қайтадан алға шығарды. Екінші таймның соңында С.Ньюиадзи тағы да мергендігімен көзге түсіп, ойынның нүктесін қойды. Ел чемпиондарын сенімді түрде жеңген «Ордабасы» турнир кестесінде 6-орынға көтерілді. Ал тұңғыш рет жеңіліп, осы күнге дейін қақ­пасына бірде-бір гол жібермей, бірден бақандай үш гол өткізіп алған «Тобыл» топ басынан үшін­ші сатыға сырғыды.

Чемпионатты сәтсіз бастаған елор­даның «Астана» клубы тур өткен сайын күшейіп келеді. Кейінгі екі турда алты ұпай иеленген елордалықтар кеше де же­ңісті жолын жалғастырды. «Астана Аренада» «Тараз» клубын қабылдап, қонақтарды 2:1 есебімен қапы қалдырды. Бірінші таймның 22-минутында алаң иелері сапынан Макс Эбонг кезекті шабуылын голмен түйіндеп, матчтың есебін ашқан болса, іле-шала қонақ команданың қорғаушысы Лука Гадрани бұрыштамадан гол соғып, таразы басын теңестірді. Ал екінші таймның 67-минутында «Тараздың» қорғаушысы Аслан Дарабаевтың пасынан кейін өз қақпасына гол соғып алды. Бұл – «Астананың» чемпионаттағы қатарынан үшінші жеңісі болса, «Тараз» осымен екінші ойында жеңілістің кермек дәмін татты.

Түркістан облысының «Мақ­таарал» клубын қабылдаған Қара­ғандының «Шахтері» қонақ­тар қақпасына бес гол соғып, турдың ең ірі жеңісін тіркеді – 5:1. Негізі қарағандылықтар осы ойын­дағы алты голдың бәрін де өздері соқты. Тек соңғысы автогол ретінде тіркеліп, қонақтар пайдасына жазылды. Стадионға жиналған төрт мың жан­күйерін жарқын жеңісімен қуантқан «Шахтер» екінші орынға көтерілді. Ал чем­пио­наттағы әзірше ең ірі жеңі­ліске ұшыраған мақталы өлкенің командасы бір ұпаймен көш соңында келеді.

Сондай-ақ бесінші тур аясында Атырауға сапар шеккен Оралдың «Ақжайық» клубы Оралхан Өмір­таевтың соққан жалғыз голының арқасында кезекті үш ұпайына қол жеткізіп, 11-орынға көтерілді. Батыстың тағы бір коман­дасы – «Ақтөбе» де сырт алаңда ке­зекті жеңісін тойлады. Павлодарда чемпионат дебютанты «Ақсумен» кездескен Владимир Муханов шәкірттері 2:1 есебімен басым түсті. Алғашқы төрт турдан кейін бас бапкер Владимир Газзаевты қыз­метінен алған «Тұран» өз ала­ңында Петропавлдың «Қызыл­жарымен» тең ойнады – 0:0.

VI тур ойындары 15-16 сәуір күндері өтеді. Жұма күні «Тұран» – «Ордабасы», «Қызылжар» – «Ақтөбе», «Каспий» – «Аты­рау», «Тобыл» – «Қайрат», «Ақ­жайық» – «Астана» командалары кездессе, сенбі күнгі ойындарда «Мақ­таарал» – «Ақсу» және «Тараз» – «Шахтер» клубтары бақ сынайды.

Турнир кестесі