Жиында баяндама жасап, ішкі істер органдарының 1-тоқсандағы жұмыс қорытындысымен таныстырған Ішкі істер министрінің орынбасарлары қылмыс деңгейінің төмендегенін айтты. Баяндамашылардың мәліметінше, елде қылмыс саны 7,3 пайызға азайған. Алайда Ішкі істер министрі Марат Ахметжанов статистикаға сүйенбеуге, елдегі жедел жағдайды нақты сауықтыру үшін жұмыс істеуге шақырды.
Қазіргі таңда ІІМ-де Big Data құралдарын пайдалану арқылы ақпараттық жүйе әзірленуде. Бұл жүйе криминогендік ахуалдың күнделікті мониторингін жүзеге асыруға, оны талдап, ең бастысы, барлық процестерді жедел әрі тиімді басқаруға мүмкіндік береді. «Ақпаратты жинау және өңдеу автоматтандырылады, шектен тыс бюрократизм жойылады, әкімшілік және сотқа дейінгі іс жүргізу оңтайландырылады», деп атап өтті министр.
Министр апробацияланған жүйе Шымкент қаласында жол қозғалысы ережелерін бұзушылардың ТОП-100-ін автоматты түрде қалай қалыптастырғанын мысалға келтірді. Мәселен, жергілікті жүргізушілердің бірі жарты жыл ішінде жылдамдық режімін 178 рет бұзып, төлейтін айыппұл көлемі 4,5 млн теңгеге жеткен. Жалпы, жыл басынан бері жол ережесін бұзған шымкенттіктерге 2,2 млрд теңгеге айыппұл салынған.
Талдау жұмыстары еліміздегі әрбір үшінші жол ережесін бұзу дерегі Шымкент тас жолдарында тіркелетінін көрсетіп берген. Мегаполистің жүргізушілері жол қозғалысы ережелерін ашық түрде елемейді. Соның салдарынан үш айдың ішінде жол-көлік оқиғаларынан 9 адам қаза болған. Бұл сан басқа өңірлермен салыстырғанда ең жоғары көрсеткіш болып табылады.
Осыған байланысты ІІМ басшысы Шымкент қаласы Полиция департаментінің басшылығына тиісті шаралар қабылдап, осы бағытта нақты жұмыстар жүргізуді тапсырды. Бұдан бөлек министр департамент басшыларына автоматты талдау деректерін ескере отырып, жолдарда тәртіп орнатуды және жүргізушілердің мәдениетін арттыруды тапсырды.
Сонымен қатар ведомство басшысы сыбайлас жемқорлыққа қарсы қызметпен бірлесіп, сыбайлас жемқорлық көріністеріне жол бермеу бойынша шаралар қабылдауды және жазаның бұлтартпастығын қамтамасыз етуді тапсырды.
Алқа отырысында құқық бұзушылықтардың және жол-көлік оқиғаларының алдын алуға мүмкіндік беретін «Қорғау» арнайы қосымшасы таныстырылды. Қосымша полиция қызметкерлерінің жол қозғалысы ережелерін қасақана бұзғандармен жұмыс істеуі үшін әзірленген.
Министр Марат Ахметжанов ауыл тұрғындары үшін бірден-бір табыс көзі болып табылатын мал ұрлығы мәселесіне де жеке тоқталып, Әлихан Бөкейханның «Қазақтың кең даласы малды асырайды, ал мал елді асырайды» деген сөзін қаперге салды. Жиында ведомство басшысы Қызылорда облысының тәртіп сақшыларын сынға алып, полицияның әрекетсіздігі салдарынан мал ұрыларының бостандықта еркін жүргенін жеткізді. Жыл басынан бері Сыр өңірінде 49 мал ұрлығы тіркелсе, ұрланған 178 бастың жартысы ғана иелеріне қайтарылған.
Министр жергілікті атқарушы органдармен үйлесімді іс-қимыл жасау, мал жаю ережелерінің сақталуын, әсіресе жиі ұрланатын иесіз жүрген малдарды қарау, жайылымдарды қадағалауды ұйымдастыру қажеттігін атап өтті. Саланы бюрократиясыздандыру, ақпараттандыру және оңтайландыру мәселелері ІІМ жүйесін жетілдіру және қылмыстың жасалу және өсу себептерін анықтау арқылы жүргізілмек.
«Полицейлер қағаздағы есеп үшін емес, адамдар үшін жұмыс істеуі керек. Полиция департаменттерінің басшыларына артық есеп беруді тоқтатып, кеңестер санын азайтуды, қызметкерлерге қойылған міндеттерді тиімді орындауға ықпал ететін оңтайлы жағдайлар жасауды тапсырамын. Полицейлер құқық бұзушылықты анықтап қана қоймай, тиісті қызметтерден сұрау жасауы керек, бұл – ортақ жауапкершілік», деді ІІМ басшысы.
Кеңейтілген алқа мәжілісінде Мемлекет басшысының балаларды қылмыстық қолсұғушылықтан қорғаудың тиімділігін арттыру, интернет алаяқтық пен есірткі қылмысына қарсы күресті күшейту, көші-қон жүйесін бақылауға алу туралы тапсырмаларының жүзеге асырылу барысы қаралды.
Жеке құрам арасындағы сыбайлас жемқорлықты жою, кадр саясатын жетілдіру мәселелері де талқыланды. Министр ең бастысы қағаздағы көрсеткішке емес, халық игілігі үшін еңбек етуді қаперден шығармау қажеттігін ескертті.
