Ресейден Қазақстанға тасқын су келе жатыр

Мәліметтерге қарағанда бұл қоймада 8 млн текшеметр су қоры бар. Аққан су Елтышевка өзеніне құйылады. Елтышевка ағып келіп Қазақстан аумағынан Жайық өзеніне жалғанады. Қауіпті аймақта Батыс Қазақстан облысы Бәйтерек ауданы Январцев ауылдық округіне қарасты Шынар (Чинарев) ауылы тұр.

Шынар ауылында мектеп пен медбекет, шекаралық застава және 82 тұрғын үй бар екен. 223 адам тіркелген. Елдімекенде 207 сиыр, 449 қой-ешкі, 2 ат, 530 қаз-үйрек есепке алынған.

Суыт хабар жетісімен батысқазақстандық төтенше қызмет өкілдері шұғыл атқа қонды. 19 сағат 27 минутта күштер мен құралдар ауылға жетті. Бәйтерек аудандық төтенше жағдайлар жөніндегі бөлімі қызметкерлері Елтышев өзенінің су деңгейі бақылауға алды. Халықты құлақтандыру, тұрғындарды эвакуациялауға дайындау жұмыстары басталды. Ауылды су басқан жағдайда халықты көшіріп, көршілес Январцев ауылдық мәдениет үйіне орналастыру жоспарланды.

Кешкі сағат 21.50. шамасында ауылға Батыс Қазақстан облыстық Төтенше жағдайлар департаментінің бастығы полковник Е.Өтегенов жетті. Жедел желі ұйымдастырылып, Орынбор облысындағы әріптестермен жедел ақпарат алмасу жолға қойылды.

Оқиға орнына төтеншеліктердің 14 техникасы, 59 қызметкері, жергілікті әкімдік органдарынан 45 адам, 10 техника, облыстық полиция департаментінен 10 адам, үш көлігімен, Ұлттық Қауіпсіздік Комитеті Шекара қызметіне қарасты «Мұқатай» шекара бекетінен 5 адам, «Жайықмұнай» мекемесінен 1 адам, инженерлік қызмет мекемесінен 2 эксковатор жүргізушісімен, жол және көпір құрылысымен айналысатын «Орал жолдары», «Стартстройсервис», «ШамШин» мекемелерінен бірнеше арнайы техника жұмылдырылды. Әзірленген арнайы техниканың ішінде қайықтар, су сорғыш құралдар да бар.

Түнгі сағат 23.40. шамасында ресейліктер тарапынан су қоймасынан аққан су қарқыны сәл саябырсығаны туралы хабар жеткен.

Шынарлықтар бұл түні көз ілмеді. Ауылда тіркелген 223 адамның 150-дейі ғана бұл жерде тұрақты тұрады екен. 115 адам өз бетінше эвакуацияланды, туыстарына орналастырылды. 20 адам, оның ішінде 4 бала қауіпсіз жерге, Январцев ауылындағы эвакобекетке жеткізілді. 10 қарт адам және 2 бала құтқарушылардың «Кунг» көлігінде уақытша бас сауғалады. Ауылда тұрғындардан 4 ер адам ғана қалды. «Санжар» шаруа қожалығына тиесілі 250 бас мал қауіпсіз жерге айдалды. Ауылда су келуі ықтимал деген тұстар, өзен жағалауы құм салынған қаптармен бекітілді. Ауыл ішінде ұзындығы 50 метр бөгет нығайтылды. Төтеншеліктердің күшімен 235 метр жерге 1285 қап және 40 метр топырақ үйіндісі төселді. Осы жұмыстарға 250 тонна инертті материал пайдаланылды.

Төтеншеліктердің баспасөз қызметі халыққа жағдайды әлсін-әлі хабарлап отырды. Сәуірдің 13-і күні түске таман өзен деңгейі түсе бастағаны байқалды. 3 жерде бақылау бекеті орналасып, судың ағысын толық қадағалауға алынды.

Соңғы мәліметтерге қарағанда, Шынар ауылының халқы тұрғын үйлеріне қайта бастаған. Январцев ауылындағы мәдениет үйіне қонып шыққан 20 адам да Жайықмұнай компаниясының автобусымен кері оралды.

Батыс Қазақстан