Атыраудан Ресейге сұйытылған газды заңсыз алып өтпекші болғандар ұсталды

Атырау облысы арқылы Ресейге 80 тонна сұйытылған газды заңсыз шығарушылар ұсталды. Бұл туралы облыстық экономикалық қылмысқа және сыбайлас жемқорлыққа қарсы күрес департаменті хабарлады. Аталған заңсыз әрекет департамент пен көлік прокуратурасының бірлескен рейді кезінде анықталды. Ресейге өту үшін Қазақстан шекарасына бағыт түзеген 5 үлкен жүк автокөлігіне 80 тонна сұйытылған газ құйылған. Ақтөбе және Атырау облыстарында тіркелген қос серіктестік басшылығы «көгілдір отынды» Қазақстан шекарасы арқылы шетелге шығаруды көздеген. Жедел тексеру  нәтижесі көрсеткендей, ресейлік нөмірлер тағылған автокөліктердегі сұйытылған газ ішкі нарыққа  шығарылғаны және оны шетелге сатуға ешқандай рұқсат етілмегені анықталды. Ел шекарасынан ірі көлемде  заңсыз тауар өткізуге әрекет жасаған серіктестік басшыларына қатысты Қылмыстық кодекстің 24-бабының 3-бөлімі (қылмысқа дайындалу және қылмыс жасауға оқталу) және 177-бабының  2-бөлімніндегі «а» тармағымен (алаяқтық)  қылмыстық іс қозғалды. Жолдасбек Шөпеғұл. Атырау облысы. Дереккөз: Облыстық департамент. Фото: www. Board.com.ua.