ЫНТЫМАҚТАСТЫҚТЫҢ ЖАРҚЫН ҚЫРЛАРЫ

Алматыда Қазақстан Республикасы Президентінің жанындағы Қазақстан стратегиялық зерттеулер институтында “Германияның Қазақстан мен Орталық Азиядағы саяси және экономикалық мүдделері” атты халықаралық ғылыми-тәжірибелік конференция болып өтті. Сөз реті келгенде атап айтарлығы, халықаралық конференция Германияның Қазақ­стандағы жылы аясында ұйымдастырылды. Оның жұмысына Сыртқы істер министрлігі Еуропа департаментінің директоры Әділ Тұрсынов, ГФР-дың Қазақстандағы Төтенше және өкілетті елшісі Райнер Шлагетер, халықаралық ұйымдар өкілдері, ғалымдар мен дипломаттар қатысты. Көпшілікке белгілі, өткен жыл­дың ақпан айында Германия­ға ресми сапары кезінде Мемлекет басшысы Нұрсұлтан Назарбаев мәшине жасау, ауыл шаруа­шы­лығы, тағам өндірісі салаларын­да­ғы ынтымақтастықты одан әрі жетілдіру және кеңейту қажеттігі туралы атап айтқан болатын. Қазақстан экономикасы үшін, сонымен қатар, жаңа технология мен инжиниринг салаларында әлемдік көшбасшы болып есепте­летін компаниялармен экономи­ка­лық байланысты одан әрі нығай­тудың маңызы жоғары екені бел­гілі. Халықаралық ғылыми-тә­жірибелік конферен­цияға қатысу­шы­лар пікірінше, “экономиканың әртүрлі салаларындағы екіжақты қарым-қатынасты одан әрі терең­детудің бүгін де, келешекте де берері мол”. Өткен жылы тауар айналы­мын­дағы кейбір күрделіліктерге қара­мастан, биылғы жылдың алғашқы тоқсанындағы көрсеткіш деңгейі біршама жақсарып, ол 948 мил­лион долларды құрады. Бір құп­тар­лығы, біздің еліміздің эко­но­ми­касына Германиядан келетін тіке­лей инвестициялар көлемі де арта түсуде. Ал мұның өзі, түптеп кел­генде, инвестициялық климаттың нақты тартымдылығының айқын кепілі. Қазақстан биылғы жылы жақын онжылдықта индустриялық-инновациялық даму бағдарламасын жүзеге асыруға кірісті. Сөйтіп, қазірде бес миллиард долларды құрайтын 140 жобаны аяқтау жоспарлануда. Сондай-ақ, 50-ге жуық жобаны жүзеге асыру жұ­мысы да басталмақ. Жиынға қа­тысып, өз пікірін ортаға салғандар неміс инвесторларын өз капитал­дарын осы жобаларға бағыттауға шақырды. Сонымен, “Германияның Қа­зақ­стан мен Орталық Азиядағы сая­си және экономикалық мүд­де­лері” атты конференцияда қауіп­сіз­дік, сауда-экономикалық, қаржы-инвестициялық және энергетика салаларына қатысты нақты пі­кір­лер мен ұсыныстар ортаға салын­ды. Тағы бір атап айтарлық жәйт, Еуропа мен Қазақстан және Орта­лық Азия елдері арасындағы қа­рым-қатынас жыл өткен сайын ұлғая түсуде. Әрине, мұның өзі Еуропалық Одақ елдерінің сыртқы саясатында Орталық Азия ел­дерінің стратегиялық маңызының артуының нәтижесі екендігі сөзсіз. Бұл орайда, Еуроодақтың Орталық Азия мемлекеттерімен 2007 жылы қабылдаған жаңа әріптестік стратегиясы ынтымақтастықтың маңызды қырларының бірі болып табылады. Бақыт БАЛҒАРИНА, АЛМАТЫ.