Ақын Әмірхан Балқыбек өмірден озды

Қазақтың белгілі ақыны, әдебиет сыншысы, Жазушылар одағының мүшесі Әмірхан Балқыбек 45 жасқа қараған шағында өмірден озды. Бұл туралы «Қазақпарат» агенттігі хабарлады. Ақын Ә. Балқыбек 1969 жылы 19 мамыр күні Оңтүстік Қазақстан облысы Жетісай ауданына қарасты Ленин атындағы ұжымшарда туған. 1986 жылы Шардара қаласындағы М. Әуезов атындағы орта мектепті бітіріп, 1987-1989 жылдары әскери  борышын өтеген. Әскерден оралған соң Шардара аудандық «Өскен өңір» газетінде тілші болды. 1995-2000 жылдары «Парасат» журналында, «Жас Алаш», «Ана тілі» газеттерінде тілші, 2000-2004 жылдары «Қазақ әдебиеті» газетінде бөлім меңгерушісі қызметтерін атқарған. Өлең топтамалары «Ауылдан ұшқан аққулар», «Толқыннан толқын туады», «Жас ақындар поэзиясының антологиясы» ұжымдық жинақтарына енген. «Метаморфоза» (1996), «Сынған сәуленің шағылысуы» (2001) жыр жинақтарының авторы. 1997 және 1998 жылдардағы  Президент стипендиясының иегері. Дереккөз: «Қазақпарат» агенттігі. Фото: «Айқын» газеті.