Қамданған қапы қалмайды

2016 жылы Рио-де-Жанейрода өтетін Олимпия ойындарына орай, қазақстандық спортшылардың дайындығына баса назар аудару қажет. Спорттық жекпе-жек және күш қолданылатын спорт түрлері конфедерациясының төрағасы Тимур Құлыбаев жұмыс кеңесінде осындай тапсырма берді. Жиналысқа күрес, дзюдо, таэк­­вондо (WTF), ауыр атлетика фе­де­рацияларының жетекшілері мен бапкерлер құрамы қатысты. «Төрт жылда бір рет өтетін байрақты бәсекеге небәрі екі жыл ғана қалды. Сондықтан да сіздер отандық спортшыларды Олимпиада ойындарына мейлінше мықтап дайындауларыңыз қажет», деді Конфедерация төрағасы. Отырыс барысында Конфе­дерация құрамына кіретін спорт түрлері бойынша ұлттық құра­ма командаларының бас жаттық­­­тырушылары есеп беріп, алдағы жоспарларын ортаға салды. Ал федерациялар президенттері биыл Қазақстанда өтетін күрес түрлерінен Азия чемпионатын (23-27 сәуір), ауыр атлетикадан лицензиялық әлем чемпионатын (4-16 қараша), таэквондодан (WTF) Бүкіләлемдік Гран-при жарысы (29-31 тамыз) және дзюдодан болатын әлемдік Гран-при турнирін (қазан айы) өткізудің дайындық барысын жеткізді. Сондай-ақ, жиын барысында ұлт­тық құрама командаларды жаттығу және жарыс барысында кешенді-ғылыми топтардың мамандарымен қамтамасыз ету мәселелері де қаралды. Федерацияларға аймақтарда мамандандырылған мектеп-интернаттар мен колледждердің материалдық базаларын нығайту, сол оқу ордаларындағы бапкер-ұстаздар қауымының біліктіліктерін арттыру арқылы бұқаралық және жоғарғы жетістіктер спортын дамы­туға баса назар аудару тапсырылды. Мұндай іс-шаралар дені сау ұрпақты қалыптастыруға және ұлттық құрамаларға қажетті кадрлық резервті дайындауға септігін тигізбек. Бұл өз кезегінде Қазақстанның әлемдік спорт аренасында бұдан да табысты өнер көрсетуіне мұрындық болары сөзсіз. Жігер ӘЗБЕРГЕНОВ.