Бағаны заңсыз қымбаттатқан

Бағаны заңсыз қымбаттатқан «АтырауАгроСервис» ЖШС сақтандыру қорындағы ауылшаруашылық тауарларын жоғары бағамен сатыпты Теңгенің айырбас бағамының өзгеруінен пайда табуға басқа емес, «АтырауАгроСервистің» барғаны қызық болып тұр. Олай дейтініміз, бұл кәсіпорын облыстағы сақтандыру қорындағы ауылшаруашылық тауарларын тұрақты бағамен сататын бірден-бір оператор. Соған қарамастан, ауылшаруашылық тауарларын жоғары бағамен сатып, ел-жұрттың қалтасын қағып келіпті. Бұл туралы экономикалық қылмысқа және сыбайлас жемқорлыққа қарсы күрес департаменті хабарлап отыр. Аталған департамент қызмет­керлері облыстық прокуратурамен бірлесе «АтырауАгроСервис» ЖШС-іне тексеру жүргізгенде сақ­тандыру қорындағы ауыл­ша­руа­­шылық тауарларын заңсыз жо­ғары­латылған бағамен сату факті­сін анықтады. Осыған орай «АтырауАгроСервис» ЖШС ди­рек­то­рына қатысты Қылмыстық ко­дек­стің 307-бабындағы 1-бөлімі­мен (Қызметтік өкілеттігін теріс пай­­далану) қылмыстық іс қозғалды. Айтпақшы, сақтандыру қорын­дағы ауылшаруашылық тауарларына тұрақты баға көтерілмейді деп өңір жұртшылығын сендір­ген жергілікті билік әзірге «Аты­рау­АгроСервистің» бағаны заң­сыз көтеру әрекетіне байланыс­ты ұстанымын білдірген жоқ. «Бағаны заңсыз көтергендерге ша­ра қолданылады» деген жергілікті би­ліктің ендігі әрекеті қалай болмақ?.. Жолдасбек ШӨПЕҒҰЛ, «Егемен Қазақстан». Атырау облысы.