Коллажды жасаған Зәуреш Смағұл, «ЕQ»
«Бірлігі жоқтың – тірлігі жоқ». Халық даналығы осылай дейді. Түйіннің бір қолмен байланып, бір қолмен шешілмейтінін бір кісідей біліп кеткен бағзы бабаларымыздың айрықша аманаты да осы татулық еді. Сол татулықтың тәжін жоғары көтеріп тұрып егемен ел атандық. Алайда азаттықтың алғышарты одан айырылып қалмау екенін бірі білсе, бірі біле бермейді. Ол үшін болаттай берік, жүректей жұмыр ауызбіршілік қажет. Ұлы дала төсін мекен еткен әрбір ұланның көкірегінде осы ой жатыр. Оған Қазақстан дейтін қара шаңыраққа уық болып қадалып, кереге болып керілген қаншама этностың тілегін қосыңыз. Міне, ел ішіндегі ерен ынтымақ бөлініп, бөріге жем болмауды осылай үлгі етті. Осылай үйретті.
Қаз дауысты Қазыбек бидің «Сөздің атасы – бірлік, анасы – шындық» деген бір ауыз сөзін бүтін ел біледі. Соны байыпты бағыт, лайықты бағдар етіп алады. Бүгінгі ұрпақ осыны ұмытпаса, ертеңгі ел жастары ерекше ұлықтаса игі еді. Себебі татулықтан асқан бақыт та, байлық та жоқ!
