Аймақтар • 29 Сәуір, 2022

Үшінші мегаполисте 90 келіге жуық есірткі тәркіленген

Шымкент қаласы бойынша былтыр 10 611 қылмыстық құқық бұзушылық тіркелген, бұл алдыңғы жылмен салыстырғанда 2,5 пайызға аз, деп хабарлайды Egemen.kz.

Ғалымжан ЕЛШІБАЙ

Қала аумағында тіркелген ұрлықтардың жалпы саны 12,0 пайызға төмендеп, ашылымы 15,8 пайызға артқан. Оның ішінде, пәтер ұрлығы қылмыстарының саны 6,3 пайызға азайды. Интернет алаяқтық бойынша 281 қылмыстық іс тіркеліп, оның 34-і сотқа жолданған, 181 іс тергеуде.

Өткен жылғы жұмыс қорытындысы бойынша халыққа есеп беру кездесуінде Шымкент қаласы Полиция департаментінің бастығы полиция генерал-майоры Қайрат Дәлбеков осындай деректер келтірді. Қала тұрғындары, ардагерлер мен қоғам белсендері қатысқан кездесу барысында, атқарылған жұмыстар мен ІІМ нұсқауымен жаңадан қолданысқа енгізілген «Қорғау» бағдарламасы жайында фильм көрсетілді. Сондай-ақ, полиция генерал-майоры үшінші мегаполистегі жалпы криминалдық жағдай мен ағымдағы жылдың жедел-қызметтік жұмыс нәтижелері туралы баяндады. Президент Қасым-Жомарт Тоқаевтың қылмысқа қарсы күресте бірқатар индикаторларды тапсырғанын атап өтті. Яғни мал ұрлығы, есірткі бизнесіне қарсы күрес, жол-көлік оқиғалары мен ауыр және аса ауыр қылмыстардың ашылу деңгейіне тоқталды. Атқарылған жұмыстардың нәтижесінде, полиция қызметкерлері интернет алаяқтықпен айналысқан 5 адамнан тұратын қылмыстық топты құрықтады. Қоғам дертіне айналған есірткі қылмысы бойынша өткен жылы 350 құқық бұзушылық жайты анықталып, жедел-іздестіру іс-шаралары нәтижесінде 24 күдіктіден құралған 5 қылмыстық топ ұсталды. Осыған байланысты былтыр заңсыз айналымнан 90 келіге жуық есірткі заттары тәркіленген. Сондай-ақ, өткен жылдың өзінде қала аумағында 435 жөл-көлік оқиғасы тіркеліп, салдарынан 76 адам қаза тапты. Ауыр дене жарақатымен 400-ге жуық азамат емханаға жеткізілген. Жалпы жол-көлік оқиғаларының жиі орын алуына жүргізушілердің жылдамдықты шаман тыс арттырып, қарсы жолаққа шығуы, қауіпсіздік белдеуін тақпай, мас күйінде тізгінге отыруы себеп. Осы орайда, ІІМ-нің нұсқауымен 20-сәуірден бастап мегаполис аумағында «Қорғау» арнайы бағдарламасы іске қосылды.

Генералдың есебінен соң, қала тұрғындары мен қоғам белсенділері ашық микрофон алдында өзекті мәселелерін жеткізіп, шешімін тыңдады. Қаратау ауданының тұрғындары мектеп көшелеріне жол белгілері мен «Сергек» жүйесіне қосылған бейнекамераларды орнатуды сұрады. Бұл орайда Қайрат Дәлбеков министрлік тапсырмасымен алдағы уақытта қала аумағына тағы 800 жаңа бейнекамера орнатылатынын, аталған аудан тұрғындарының өтініші ескерілетінін айтты. Сондай-ақ, «Нұрсәт», «Күншығыс» шағын ауданының азаматшалары автотұрақ мәселесі жайында сауалдарына жауап алды. Және жеке сұрақпен келген азаматтардың өтініштері қанағаттандырылып, бірқатар мәселелер басты назарға алынды.

Күннің маңызды және өзекті жаңалықтарын «Егемен Қазақстан» телеграм каналынан оқыңыз