Қазіргі Конституциямызда «мемлекеттік биліктің бірден-бір бастауы – халық» деп, нақты әрі түсінікті жазылған. Осы қағидаға сүйенетін болсақ, Ата Заңымызға енгізілетін кез келген өзгерісті жалпыхалықтық референдум арқылы халықпен кеңесе отырып қабылдау керек. Сондықтан мен Президентіміздің бұл бастамасын толық қолдаймын.
Бұл ұсыныс ел Президенті жариялаған «Халық үніне құлақ асатын мемлекет» тұжырымдамасын іске асырудың лайықты жалғасы. Осылайша, Қасым-Жомарт Тоқаев елімізді жаңарту және Жаңа Қазақстан құру бағытындағы өзі белгілеген бастамаларды жүйелі түрде жалғастырып отыр.
Ашығын айтқанда, біз халықпен кеңесіп, пікірлесу жағын сәл естен шығарып алдық. Елімізде ширек ғасырдан астам уақыт бойы бірде-бір референдум болған жоқ. Дәл қазір халықтың қолдауы Қасым-Жомарт Кемелұлына өзі бастаған саяси, экономикалық және әлеуметтік реформаларды іске асыру жолында батыл қадамдар жасауға жол ашады. Конституцияны жаңартпай әділетті, Жаңа Қазақстан құру мүмкін емес. Алдағы референдумда халық өзінің салмақты сөзін, салиқалы пікірін білдіреді деп сенемін. Ол үшін тек халықтың үніне құлақ түру қажет.
Мұхтар ҚҰЛ-МҰХАММЕД,
Сенат депутаты