Туризм: Мемлекет пен нарықтың «командалық жұмысы» маңызды

Алматы – Қазақ­стан­дағы туристер ең көп келетін, әлем жиһанкездерін тартуға әлеу­еті жететін әсем қала. Мәселен, жуыр­да осы шаһарда өткен туризм сала­сын­дағы Орталық Азиядағы ең ірі «Туризм және саяхат» – «KITF» көрмесіне шартараптан 211 туристік компания, 18 ел ресми түрде қатысқан болатын.

Аталған саланың мамандары Қа­зақстанға келген әрбір екінші шетелдік турист міндетті түрде Алматыда болатынын атап өткен еді. Өткен жылы туристер саны 65%-ға өсіп, 1,2 млн-ға жеткен, бұл рес­пуб­ликалық көрсеткіштің бестен бір бөлігі – 5,4 млн адам. Дегенмен 2025 жылға қарай Алматыға кемі 2,3 млн турист тарту жоспарланып отырған жайы бар.

Туризм саласындағы қызметтер көлемі өткен жылы 27,9 млрд тең­гені құрады, бұл 2020 жылдың көр­сет­кішімен салыстырғанда 66%-ға артық. Салаға 46,3% өсіммен 100,7 млрд теңге инвестицияланды.

Министрдің Алматы қаласындағы туроператорлар, бизнесмендер, Kazakh Tourism ұлттық компаниясы АҚ, Алматы қаласы мен Алматы облысы әкімдіктерінің өкілдерімен кездесуі осы мақсатқа серпін беруі тиіс.

«Біз шетелдердегі гранд турлардың көптеген мысалдарын білеміз. Мысалы, Швейцарияда бүкіл ел аумағын қамтитын үлкен тур өтеді, оны турис­тер бөліп-бөліп немесе толығымен өткізе алады. Осылайша, бір саяхатта бүкіл бағытты біле аласыз. Маршрут бойында түрлі тақырыптарға арналған, көліктің әр түрінде іс-шараларды ұсынатын турлар құрылуы мүмкін», дейді министр.

Сонымен қатар Д.Абаев ту­рис­терді тартатын маршруттар тақыр жер­ден пайда бола салмайтынын атады. «Таптаурын соқпақ» қағидаты бо­йынша туристерге қызықты әрі сұра­нысқа ие маршруттар бірінші кезекте жақсартылады және дамытылады.

Еліміздің бес өңірінде бағыттар анық­талған. Олардың ішіндегі ең та­нымалдары – оңтүстік-шығыстағы «Ал­маты: 4 маусым» мен Қазақстанның оң­түстігіндегі «Ұлы Жібек жолы». Бұл ретте «Жібек жолы» бағыты қолда­ныстағы трансшекаралық бағыт­тың бір бөлігі саналады және Қы­тай­мен шекарада басталып, Өзбек­станда жалғастырылуы мүмкін. Одан әрі еліміздің оңтүстік-батысындағы Маң­ғыстаудың көздің жауын алар пейзажы, шығысында Алтайдың тұмса таби­ғат көрінісі және «Сарыарқа» бағы­ты­ның екі бөлігі: солтүстік және шығыс – бұл Бурабай, Имантау-Шал­қар, Баянауыл және Қарқаралы дала­ларындағы інжу-маржандарымыз.

Министрлік осы бағыттарды жос­парлы түрде дамытуды ұсынады: алдымен – таңдалған маршруттарды абаттандыру, екінші кезеңде – «жұм­сақ» инфрақұрылымды және маршруттарды сапалы тұрғыда дамыту. Келесі кезең – туроператорлармен бірге мақ­сатты түрде турларды белсенді жылжыту.

Д.Абаевтың айтуынша, бұл мәселеде мемлекет пен нарықтың бір­лес­кен «командалық жұмысы» аса маңызды.

Өз кезегінде «Kazakh Tourism» Ұлттық компаниясының басқарушы директоры Даниел Сержанұлы «Kazakh Tourism» негізгі күш-жігерін мамандарды оқытуға, стандарттау және маркетинг жөніндегі іс-шараларды қоса алғанда, гранд маршруттар айна­ласындағы туристік өнімдерді дамытуға бағыттап отырғанын атады.

Алайда ішкі туризм бойынша отандық туроператорлардың басшылары маршруттарды жүйелі әрі нақты дамытудың маңыздылығына, сонымен бірге туристердің жайлылығын арттыруға көмектесетін кейбір проб­лемаларды шешу керектігін атап өтті.

Сондай-ақ кездесу аясында NeoNomad акциясы туралы айтылды. Жобаның мәні Қазақстан ішінде туристердің келуіне ұсынылатын орындар тізімін қалыптастыру. Акция биылғы мамыр айына жоспарланған. Акцияның негізгі идеясы – туристерді арнайы фотоспоттарда суретке түсіру. Жобаға барлық өңір бойынша 20 орын қамтылған, нысандардың бір бөлігі гранд маршруттар бойында орналасқан.

Бұған дейін де Мәдениет және спорт министрі Д.Абаев:  «Біз 2025 жылға қарай туризм саласында 60 мыңға жуық жаңа жұмыс орнын ашуды көздеп отырмыз. Инвестициялық және инфрақұрылымдық жобалар­ды іске асыру да, сондай-ақ экономиканың түрлі саласында халықтың жұ­мыс­пен қамтылуына жол ашатын турбизнес қызметін жандандыру да осыған ықпал етеді. Бұл білікті кадрларға деген сұранысты арттырады», деген болатын.

Қалай десек те, отандық туризмді дамытуда кадрлар дайындаудан бөлек, бұрыннан шешімін таппай келе жатқан бірқатар мәселе бар, оның барлығы да бұрыннан айтылып, қозғалып келеді. Министр туроператорлармен кездесу барысында туризмді дамытудың түйткілдерін де тыңдап, істі ілгерілетудің жолдарын  саралады.