2022 жылы елімізде Ата Заңға өзгерістер енгізу бойынша референдум өткізілмек. Барлығы 33 бапқа, яғни Ата Заңның үштен біріне өзгеріс енгізу көзделіп отыр. Референдум арқылы «Күшті Президент – ықпалды Парламент – есеп беретін Үкімет» формуласынан тұратын мемлекеттік басқарудың моделін қалыптастыру халықтың талқысына ұсынылмақ.
Жаңа өзгерістер бойынша Үкіметтің Парламент алдындағы жауапкершілігі артады. Заң шығарушы орган Мәжіліс болмақ. Аудандық, қалалық мәслихаттар толығымен мажоритарлық, облыстық маслихаттар аралас жүйе бойынша сайланбақ. Бұл өз кезегінде мәслихаттар рөлінің күшеюіне алып келеді.
Енді саяси партия құрамын дейтін азаматтар үшін 5 мың азаматтың қолын жинау жеткілікті. Партиялардың Парламентке өту шегі 7-ден 5 пайызға дейін түсірілді. Облыс, қала, аудан әкімдері мен олардың орынбасарлары саяси партия филиалдарының төрағасы болмайды. Бұл өзгерістер барлық партияларға тең мүмкіндіктер береді.
Осы секілді еліміздің болашақ даму барысын айқындайтын Ата Заңның 33 бабына өзгерістер енгізіледі. Әрбір азаматқа тікелей қатысы бар мұндай мемлекеттік маңызды істерді референдум арқылы халықтың пікірімен санаса отырып жүргізу оң бастама деп санаймын.
Бауыржан СЕРІКБАЕВ,
саясаттанушы
