Қаржы дамуға бағытталуы тиіс

Кеше Астанадағы Орталық коммуникациялар қызметiнде Премьер-Министрд1iң орынбасары – Қаржы министрi Бақыт Сұлтанов баспасөз мәслихатын өткізді. Онда ел экономикасын дамыту шаралары сөз болды. Брифингке Экономика және бюджеттік жоспарлау министрі Ерболат Досаев, «Самұрық-Қазына» ҰӘҚ» АҚ-тың басқарма төрағасы Өмірзақ Шөкеев, сондай-ақ «Бәйтерек» ұлттық басқарушы холдингі» АҚ-тың басқарма төрағасы Қуандық Бишімбаев қатысып, журналистердің сан алуан сұрақтарына жауап берді. Ел экономикасының бірқалыпты дамуы туралы әңгімелеген вице-премьер, Елбасының тапсырмасы бойынша, экономикалық дамуды әртараптандыру шаралары негізді жалғасып жатқаны жөнінде айтты. Өз кезегінде, елімізде өткiзiлгелi отырған көлеңкелi экономикадағы қаражатты заңдастыру шарасы туралы да әңгімеледі. Бұл жолғы мүлiктiң заңдастырылуы да 2006-2007 жылдарда өткен шараға ұқсас болады екен. Қазіргі күнде соның негiзiнде заң жобасы дайындалып жатқан көрінеді. «Ал жария етiлетiн ақшаға келетiн болсақ, ол табыс болып саналмайды. Сондықтан оған салық та салынбайды. Мұнымен бірге, жария еткен тұлғалар қылмыстық, әкiмшiлiк және тәртiптiк жауап­кер­шiлiкке де тартылмайды. Осы шара барысында жария етiлген қаражаттар туралы жеке ақпараттардың құпиялығы сақта­лады. Сондай-ақ, салықтық, қыз­меттiк материалдар да құпия күйінде қалады», дедi Үкімет басшысының орынбасары. Вице-премьердiң айтуына қарағанда, заңдастырылған қаражат екiншi деңгейлi банктерде орналастырылады. Және оған байланысты баламалы құралдар да ұсынылатын болады. Ол туралы, «Егер адамдар депозитке ақшаларын салғысы келмесе, онда өзге құралдарды сатып алу құқығы берiледi. Атап айтқанда, Қазақстан экономикасына құя алады. Мәселен, мемлекеттiк құнды қағаздарды, екiншi деңгейлi банктердiң облигацияларын сатып ала алады. Бұлармен бірге, ұлттық компаниялардың, даму институттарының акцияларын, «Халықтық IPO» арқылы мем­лекеттiк меншiктегi компа­ния­лардың бағалы қағаздарын алуы­на болады. Сондай-ақ, жеке­ше­лен­дiрудiң екiншi толқыны аясында мүлiктi жеке меншiгiне сатып алуына мүмкіндік жасалады», дедi Б.Сұлтанов. Ел азаматы ақшасын жоғарыда аталған құралдарға жұмсағысы келмесе, қаражатты депозиттен шешуiне ырық берілмек. Бiрақ банк ол сомадан 10 пайыздық алым алады екен. Бұл салық емес, қазақстандықтарды ел экономикасына инвестициялауға ынталандырудың бiр құралы көрінеді. Депозитте сақталса, ол банктiң қорын көбейтедi, егер мемлекеттiк нысандарға жұм­салса, ел экономикасының де­ң­гейiн жоғарылататынын айтты, вице-премьер. Оның сөзіне қа­ра­ғанда, Мемлекет басшысының тапсырмасына орай, заңдастыруды оңтайлы жүргізу мақсатында Үкi­метте арнайы жұмыс тобы құры­лыпты. Экономиканы жаңғырту мен әртараптандыруды қамтамасыз ету үшін осы жылдың 1 маусымына дейін 2015-2019 жыл­дарға арналған үдемелі индус­трия­лық-инновациялық даму мем­лекеттік бағдарламасын әзір­леу аяқталады. Сөйтіп, индус­трия­лық-инфрақұрылымдық жобаларды жүзеге асыру мақсатына 150 млрд. теңге қаржы бөлінеді екен. «Жобалардың тізімі де осы жылдың 1 маусымына дейін жа­са­лып болады. Қолданыстағы келісімдерді сақтап қалу үшін және жаңа келісімдерді жасау бағы­тында тиісті жұмыстар атқа­рылады», деді ол туралы Е.Досаев. Бұған қоса, биыл ел эко­но­микасына Ұлттық қордан 500 млрд. теңге бөлінетін кө­рі­неді. «Ел экономикасының өсі­мін ынталандырудың негізгі көз­дерінің бірі Ұлттық қордан бөлінетін 1 трлн. теңге болады. 2014 жылы бұл қаржыдан 500 млрд. теңге алынады. Шағын жә­не орта бизнесті несиелеуді қол­дауғ­а 100 млрд., банк секторын сауық­тыруға 250 млрд., үдемелі индус­триялық-инновациялық бағ­­дар­ламаны іске асыруға 150 млрд. теңге қаржы бағытталады», деді министр. Баспасөз мәслихатында «Жұмыспен қамту жол картасы» бағдарламасын жүзеге асыруға байланысты іс-шаралар да әңгіме арқауына айналды. Бұл мақсатқа биыл 97 млрд. 700 млн. теңге қарастырылып отыр екен. Ал Үкімет жекешелендірудің екінші толқынына қатысатын ұйымдардың тізімін осы сәуірде анықтап болады екен. Алдын ала жасалған тізімге республикалық меншіктегі 32 ұйым, ком­му­нал­дық меншіктегі 586 нысан және ұлттық компаниялар мен холдингтердің құрамындағы 191 ұйым енгізіліпті. «Қажетті нормативтік актілер қабылданған соң, мамыр-маусым айларында квазимемлекеттік сектордағы ұйымдарды бәсекелес ортаға дайындау және өткізу басталады», деді министр. «Самұрық-Қазына» ҰӘҚ» АҚ биыл «Халықтық IPO» аясында нарыққа шығатын компанияларды бекітіп болыпты. Атап айтқанда, қор нарығына екі компания – «KEGOC» АҚ пен Маңғыстау электр тарату компаниясы шығады екен. Ал келесі жылы «Самұрық-Энерго» АҚ, «ҚазТрансГаз» және өзге компаниялар нарыққа шығарылады деп жоспарланыпты. Бұйыртса, биыл 1 желтоқсанға дейін Жезқазған – Бейнеу теміржолы салынып бітеді. «Бүгінгі жағдайға байланысты көлік және логистикалық инфрақұрылымды әрта­раптандыру және Қазақстанның транзиттік әлеуетін арттыру бойынша шаралар қолға алынады. 1 шілдеге дейін Ақтау портының өткізу қуатын кеңейту үшін 3 құрғақ жүк терминалдарының құрылысы басталады. Сондай-ақ, 1 шілдеге дейін «Қорғас-Шығыс қақпасы» арнайы экономикалық аймағында құрғақ портының құрылысы басталады», деді Е.Досаев. Үкімет 2030 жылға дейінгі қаржы секторын дамыту тұ­жырымдамасын да маусым айында қабылдауды көздеп отыр екен. «Банктерден «түйт­кілді активтерді» сатып алуды қаржылық қамтамасыз ету үшін «Проблемалы кредиттер қоры» АҚ-ты капиталдандыру қарастырылып отыр. Бұл мақсатқа Ұлттық қордан 250 млрд. теңге бөлінеді. 1 маусымға дейін зейнетақы активтерін басқару бойынша тұжырымдама қабылданып, 2030 жылға дейін қаржы секторын дамыту тұжырымдамасы мен оны жүзеге асырудың 2020 жылға дейінгі іс-шаралар жоспары тиянақталады», деді министр. Сондай-ақ, шағын және орта бизнесті дамытуға 2014 жылы 100 млрд. теңге бөлінбек. Ол туралы, «Шағын және орта бизнес жобаларын қаржылық ресурс­тармен қамтамасыз етуге осы жылы 100 млрд. теңге бөлінеді. Бүгін Үкімет шағын және орта кәсіпкерлікті қолдау бойынша іс-шаралар жоспарын қабылдады», деп түйіндеді сөзін Е.Досаев. Нұрбай ЕЛМҰРАТОВ, «Егемен Қазақстан».