Бұл жолы Қалқаман шағын ауданындағы №7 аурухана дәрігерлері 26-27 сәуір күндері семіздіктен қиналып жүрген 4 пациентке лапароскопиялық бариатрия жасады. Олардың бірі – 40 жастағы әйел. Жылдар бойы семіздікпен алысу нәтиже бермеген соң операция жасатуға бел буған. Артық майдың салдарынан салмағы 103 килоға жеткен әйел сәтті жасалған операциядан кейін бірден №2 хирургия бөлімшесіне ауыстырылды. Қазір пациенттің жағдайы бір қалыпты, өз бетінше жүріп-тұра алады.
«Лапароскопиялық бариатрия – артық салмақты реттеп, семіздік салдарынан болатын артериалды гипертензия, жүректің ишемиялық ауруы сынды ілеспе дерттерді емдеуге мүмкіндік беретін заманауи әдіс. Операцияның бұл түрі біздің клиникада 2019 жылдан бері жасалып келеді. Бірлескен операцияны аурухананың хирургия бөлімі меңгерушісі Мұса Сахиповпен бірге белгілі хирург Орал Оспанов жасап жүр», дейді №7 аурухананың өкілдері.
Дәрігер Мұса Сахиповтің айтуынша, операция адамның жасына, қосымша аурулары мен зат алмасу процесіндегі ерекшеліктерге қарай жасалады. Манипуляциядан кейін пациент шамамен 15-тен 80 килоға дейін салмақ тастайды.
Мамандар дерегіне сүйенсек, қазіргі таңда операциядан кейін жалғанған ішектердің жүрмеуі, анастомозда жара пайда болуы сынды асқынулар саны азайған. Сонымен қатар операция ұзақтығы, ауруханада жату мерзімі де қысқарған. Заманауи қондырғылар пациенттің тез арада аяққа тұруына мүмкіндік береді.
Көрсетілімдерге байланысты және жоспарлы түрде жасалатын операцияның құны – шамамен 600 мың теңге. Жоғары технологиялы операция ақысы МӘМС пакеті арқылы төленеді, бірақ пациент операцияға қажетті бір реттік материалдарды өзі сатып алады.
Мамандар артық салмақ атеросклероз, гипертония, инфаркт, инсульт, қант диабеті, асқазан-ішек ақауы, артрит, репродуктивтік жүйе қызметінің бұзылуы сынды ауруларға әкеп соқтыратынын қаперге салады. Хирургиялық операция жасау туралы шешім дәрі-дәрмекпен емдеу нәтиже бермеген күрделі жағдайларда ғана қабылданады.
Қазіргі таңда өмір сүру салты мен ішкен-жегенге байланысты семіздік әлемдік деңгейдегі мәселенің бірі. Ұлттық қоғамдық денсаулық сақтау орталығының дерегінше, халқымыздың 20%-дан астамы семіздікке шалдыққан.
АЛМАТЫ
