Нигерия автобекетіндегі жарылыстан 70 адам қаза болды

Нигерия астанасы - Абуджа қаласындағы автобекетте орын алған жарылыстан 71 адам қаза болып, 124 адам жарақат алды. Бұл туралы ИТАР-ТАСС хабарлады. Мамандар терактіні Нигерия аумағында ислам мемлекетін құруды көздейтін «Боко харам» экстремистік тобы ұйымдастырды деген күдік келтіріп отыр. Аталмыш топ биылғы жылдың басынан бері жүздеген адамның өліміне себепші болған екен. Мәселен, үстіміздегі жылдың 20 ақпанында «Боко харам» содырлары Нигерияның солтүстік-шығысындағы Бама қаласына шабуыл жасап, 60 адамды мерт еткен. Ал 25 ақпанда олар мектепке кіріп, 29 оқушыны атып өлтірген. Сондай-ақ наурыздың басында аталмыш топ мүшелері Майдугури қаласында теракт ұйымдастырып, 50 адамды өлтірген. Сәуірдің басында Нигерияның солтүстік-батысында қауым жетекшілері мен өзін-өзі қорғау жасағы мүшелеріне шабуыл жасап, 80 адамды қырып салды. 2013 жылдың мамыр айында Нигерия президенті Гудлак Джонатан «Боко харам» тобына қарсы әскери операция басталғанын мәлімдеген болатын. Биліктің хабарлауынша, операция барысында экстремистердің негізгі базалары жойылған. Алайда, жекелеген топтар әскерилерден қашып құтылған. Енді олар партизандық соғыс тәсіліне көшкен көрінеді. Айдар Өрісбаев. Дереккөз: Itar-tass.com. Фото: EPA/STR.