Оқулық жайы ойлантады

«Нұр Отан» партиясы жанын­дағы «Мирас» қоғамдық кеңе­сі­нің мемлекеттік тілді оқыту­дың жай-күйіне, қазақ тілін­дегі оқулықтар мен оқу-әдіс­теме­лік материалдардың сапасына кеңейтілген отырыс арнауы – халықтық партияның ел рухания­тының өзекті мәселелеріне ұдайы көңіл бөлуінің бір көрінісі. Кеше Парламент Мәжілісінің Халықаралық істер, қорғаныс және қауіпсіздік комитетінің төрағасы Мәулен Әшімбаевтың жетекшілігімен өткен отырыста басты назар оқулықтардың жай-күйіне аударылды. Отырысқа кеңес мүшелерімен қатар осы іске тікелей қатысты министрліктер басшылары, оқулықтар дайындаумен,  шығарумен айналысатын ғалымдар, баспа директорлары шақырылды. Білім және ғылым министрі Аслан Сәрінжіповтің баяндамасында салада осы бағытта атқарылып жатқан жұмыс әңгімеленіп, ше­шуін күткен мәселелердің түйі­нін табу жолдары сөз етілді. Мәде­ниет министрі Арыстанбек Мұха­медиұлының сөзінде дайындалған оқулықтардың сапалы жарық көруінің мәселелері қозғалды. Қоғамдық кеңес осыдан біраз уақыт бұрынғы отырысында қазақ тіліндегі оқулықтарды сараптау жөнінде жұмыс тобын құрып, оған Қазақ мемлекеттік қыздар педагогикалық университетінің ректоры Динар Нөкетаеваны же­тек­ші етіп белгілеген еді. Ди­нар Жүсіпәліқызы партия­лық тапсырмаға барынша жауап­тылықпен қарағанын көрсет­ті. Оның баяндамасында оқу әде­биеттеріне сараптама жүргізу нәти­жесі нақты айтылып, жетіс­тіктер мен кемістіктер терең талданды. Бұл жұмысқа 51 оқытушы тартылып, 173 оқу әдебиетіне сарап­тама жүргізілген екен. Олардың 56-сы бастауыш сынып оқулықтары, 78-і орта буын оқулықтары, 39-ы жоғары сынып оқулықтары. Тексеру барысында кейбір оқулықтардың типтік оқу бағдарламасына сәйкессіздігі, тақырыптарда ауытқулардың кездесуі, оқу бағдарламасын толық қамтымауы сияқты қағидатты кемшіліктер анықталған. Білім алушылардың дайындық деңгейі мен жас ерекшеліктерінің ескеріл­меуі, түсініктер мен термин­дерді енгізу әдістемесіндегі олқы­лық­тардың орын алуы, оқушы­лардың шығармашылық белсен­ділігін және интеллектуалды әлеуе­тін, логикалық ойлауын дамы­туды қамтамасыз ететін материал­дар­дың жетілдірілмеуі сияқты жай­лар нақты мысалдармен дәйектелді. Ұлт руханиятындағы тұғырлы тұлғалардың бірі Мырзатай Жол­дас­бековтің сөзімен айтқанда, «тіл тағдыры үшін торғайдай шырылдап сөйлеген» қоғам қайраткері Бекболат Тілеуханның баяндамасы эмоциялық жағынан қуатты, мағыналық жағынан салмақты шықты. Парламент Мәжілісінің депутаты Алдан Смайылдың баяндамасы қатпары қалың мәселені терең қозғауымен ерекшеленді. «Тілдауа» қоғамдық қорының құ­рыл­тайшысы, әдіскер мұғалім Төлеу Аймағанбетованың, Мә­жіліс депутаты, Президент жанын­дағы Адам құқықтары жөнін­дегі комиссияның төрағасы Қуа­ныш Сұлтановтың, «Хабар» агент­тігі акционерлік қоғамының про­дюсері Меруерт Құмарованың, Қазақ Ұлттық педагогикалық уни­вер­ситетінің профессоры, дең­гейлік оқу әдебиеттерінің авторы Фаузия Оразбаеваның, Қазақ Ұлттық педагогикалық универ­ситетінің Оқытудың мазмұны мен әдістемесі институ­тының директоры Алма Әбілқасымованың, Ш.Айманов атындағы «Қазақ­фильм» акционерлік қоғамының пре­зиденті Ермек Аманшаевтың, «Оқулық» республикалық ғылыми-практикалық орталығының директоры Бейбіткүл Кәрімованың, Байланыс және ақпарат агент­тігі төрағасының орынбасары Алтай Әбибуллаевтың, Қазақ­стан Республикасы Орталық мемлекеттік мұражайының директоры Нұрсан Әлімбайдың сөздерінде баршаны толғандырар тақырып әр қырынан, белсен­ді­лікпен, жауапкершілікпен, білік­тілікпен талданды. Отырысты қорытқан сөзінде «Мирас» қоғамдық кеңесінің төрағасы Мәулен Әшімбаев ортаға салынған пікір-ұсыныстардың бәрі жинақталып,  тиісті министрлікке жолданатынын, белгілі бір уа­қыт­тан кейін бұл бағытта атқарылған жұмыс жөнінде нақты ақпарат талап етілетінін айтты. «Мирастың» шамамен маусым айында өтетін келесі отыры­сында Мәдени саясаттың ұзақ мер­зімді тұжырымдамасының жобасын талқылау көзделіп отыр. Мұн­­дай тұжырымдаманы әзірлеу қажет­тігін ел Президенті Нұрсұл­тан На­зар­баев «Қазақстан жолы – 2050: бір мақсат, бір мүдде, бір болашақ» атты Жолдауында көр­сеткен болатын. Сүлеймен МӘМЕТ, «Егемен Қазақстан».