Кезекті жарыс күні балуандарымыз қуантты. Грек-рим күресінен өткен белдесуде Қайратхан Шонкудың асқан шеберлігіне тәнті болдық. 130 кило салмақта күш сынасқан қандасымыз қарсы келгендердің барлығын қоғадай жапырып, финалда ол түркиялық Мехмет Юсалдымен айқасты. Бұл тартыс Қайратханның айқын жеңісімен аяқталды.
97 кило салмақта күрескен Асылан Тәжиевтің де жеңіс тұғырының ең биік сатысына көтерілуге жақсы мүмкіндігі болды. Алайда шешуші тұста жеңіліс тапқан ол күміс медальды мойнына ілді. Ал Алдияр Балташев (60 кило) пен Нұржан Асан (77 кило) белдесулерін қола жүлдемен қорытындылады.
