Кездесу барысында депутаттар референдум жайлы түсініктеме беріп, жұмысшылардың мұң-мұқтажын және лебізін тыңдады. Жиында референдумға қатысты тың ойлар айтылып, депутаттар Жаңа Қазақстанды бірге құруға шақырды.
Мәжіліс депутаты Динара Закиева көпбалалы ананың әлеуметтік жағдайына байланысты сұрағына жауап беріп, алдағы уақытта мәселенің шешілуін өз бақылауына алатынын мәлімдеді.
Басқосу кезінде депутаттар жалпыхалықтық референдумның маңызына тоқталып, еңбек ұжымына дауыс берудің ережелері мен шарттарын түсіндірді. Кездесуде қатысушылардың сұрағына нақты жауап берген Мәжіліс депутаттары әр баптың өзгерісіне жеке-жеке тоқталды. Атап айтқанда, суперпрезиденттік басқару формасынан түпкілікті бас тарту, Президент туыстарының квазимемлекеттік сектор мен мемлекеттік қызметте басшылыққа тағайындалмайтындығы жөніндегі өзгертулерге кеңінен түсініктеме берді.
- Жер және жер қойнауы – халықтың меншігі;
- «Өлім жазасына» тыйым салу;
- Президент және судьялар, сайлау комиссиясының өкілдері, әскери және Ұлттық қауіпсіздік қызметшілері ешқандай партияның, қоғамдық бірлестіктердің мүшелігінде болмауға тиіс.
Сонымен қатар шарада депутаттармен Ата Заңға өзгерістер мен толықтырулар енгізу жөніндегі республикалық референдумды қолдауға қатысты салмақты дәлелдер мен шынайы себептер айтылды.
Ұйым қызметкерлерінің жылы шырайы мен ел тағдырын айқындайтын осынау маңызды кезеңде белсенділік танытуы қызметкерлердің азаматтық ұстанымының дұрыстығын дәлелдейді.
Шара соңында арнайы қағазға ұсыныстар мен талап-тілектер жазылды.
Мәселенің басым бөлігі баспана, зейнет жасын азайту және жалақы мөлшерінің аздығы болды.
Кездесу соңында ұйым қызметкерлері депутаттарға өз ықылыстарын білдіріп, жалпыұлттық референдум өткізу бастамасын қолдайтынын және Жаңа Қазақстан құру жолында мемлекетке үлкен сенім артатынын жеткізді.