Алматы қалалық сотының баспасөз қызметі хабарлағандай, қаңтар айының 6-сынан 7-сіне қараған түні Қарағандының 23 жастағы тұрғыны Maxima ойын-сауық кешенінің жанынан өтіп бара жатып, терезелердің сынғанын байқаған.
«Сотталушы кешеннің ішіне кіріп, екінші қабаттағы Prato дүкенінен құны 33 333 теңгелік Iphone-6 маркалы ұялы телефонын, кейін Monamie дүкенінен құны 30 351 теңге Dior иіс суының екі құтысын ұрлаған. Сот бұл әрекеттерді Қылмыстық кодекстің 188-бабы, 3-бөлігінің 2, 3-тармақтары бойынша ұрлық, яғни, қоймаға заңсыз кіру арқылы бірнеше рет жасалған бөтеннің мүлкін жымқыру деп таныды. Сотталушы өз кінәсін мойындап, басқа адамдардың дүкендерден зат алып жатқанын көрген соң өзі де кіріп, тауарларды ұрлағанын айтты. Ал Қылмыстық кодекстің 188-бабы, 3-бөлігінің 2, 3-тармақтары бойынша екі жылдан жетi жылға дейiнгi мерзiмге бас бостандығын шектеуге, не сол мерзімге бас бостандығынан айыру жазасы қарастырылған. Сот оның жастығын, кінәсін мойындағанын, шын ниетпен өкінгенін және бірінші соттылығын ескере отырып, минималды екі жыл мерзімге бас бостандығын шектеу жазасын тағайындады», делінеді қалалық соттың хабарламасында.
Үкім заңды күшіне енген жоқ.
