ШҚО полиция департаментінің баспасөз қызметі таратқан ақпаратқа қарағанда, аудандық ПБ криминалдық полиция бөлімшесінің қызметкерлері мемлекетаралық іздеуде жүрген екі қылмыскерді анықтады.
Олар 30 жастағы Айбек Түсіпханов пен 29 жастағы Диляра Камитова есімді облыс тұрғындары екені және бұған дейін істі болғаны белгілі болды.
«Сот үкімі бойынша екеуіне бас бостандығынан шектеу жазасы тағайындалған. Алайда сотталғандар пробация қызметіне міндетті тіркеуге келмеген. Олардың қайда екенін анықтау бойынша жүргізілген алғашқы іздестіру шаралары нәтиже бермеді. Сондықтан оларға мемлекетаралық іздеу жариялау туралы шешім қабылданған», делінген хабарламада.
Көп ұзамай іздестіру жұмыстары оң нәтиже берді. Сотталғандардың бірі Шығыс Қазақстан облысы Шемонаиха ауданы Верх-Уба ауылында ұсталды.
Сақшылардан жасырынған екінші адам Алтай қаласынан табылды.
«Полицейлерге іздеуде жүрген азамат туысының үйінде жасырынып жүргені туралы жедел ақпарат келіп түскен. Ұсталған кезде ер адам әжесінің шкафында жасырынып отырған. Қазіргі уақытта екеуі де изоляторға қамауға алынды», делінген хабарламада.
