Қазақстан • 17 Мамыр, 2022

Ел дамуының болашағына арналды

46 рет көрсетілді

Қазақстан халқы Ассамблеясы Журналистер клубының кезекті отырысында «Жалпыхалықтық плебисцит: жаңа мүмкіндіктер мен даму болашағы» тақырыбы талқыланды.

Ақпарат және қоғамдық даму министрлігі Қоғамдық келісім мекемесінің директоры Ғалымжан Құсманғали БАҚ өкілдерімен бірге қазіргі таңда елдегі өзекті мәсе­лелердің бірі – конституциялық реформалар мен республикалық референдум жайында пікірлесті. Ашық әңгіме форматында өрбіген кездесуге БАҚ өкілдерімен қатар блогерлер және Нұр-Сұлтан қаласы этномәдени бірлестіктерінің өкіл­дері қатысты.

«Жалпы Президент ұсынған реформалар – ел өмірінің барлық саласын қамтитын кешенді жос­пар. Сол себепті ол өзгерістерді өмір­ге енгізу бәріміздің, яғни әрбір Қазақ­стан азаматы­ның атсалысуын қажет етеді. Әрбір қазақстан­дық­тың пікірі ел тағдыры үшін маңызды. Өз ке­зе­гінде референдум сияқты саяси тетіктің 27 жыл өткеннен кейін қол­данылуы, алдағы уақытта қабыл­данатын шешімнің тарихи маңыз­­ды­лығын тағы да бір мәрте ай­қын­датып отыр. Ре­ферендумда конс­ти­ту­циялық реформалар­ды қол­дауы­мыз – Мемлекет басшысы ұсынған Жаңа Қазақстан мен Екінші Республика идеясын жан-жақты қолдаудың нақты көрінісі болмақ. Алдағы реформалар Ассамблея қызметін де қамтиды. Қазақстан халқы Ассамблеясы тәуелсіздік жылдары халық бірлігін нығайту ісіне белсенді араласқаны баршамызға белгілі. Дегенмен, өзгерістер – қазіргі заман талабы», деді Ғалымжан Құсманғали өз сөзінде.

Бүгінгі күні қоғамдық келісімде де бірқатар өзгеріс орын алды. Мәселен, Ассамблеяның өзімен қатар құрылымдарының да, оның ішінде Журналистер клубының да жұмысы жаңа форматқа көшкен. Құрамы жаңарды. Енді клуб тізгінін Abai TV телеарнасының директоры Азамат Кеңесұлы жүргізеді.

Естеріңізге сала кетейік, Қазақ­стан халқы Ассамблеясы жанындағы Журналистер клубы этносаралық мәселелерді қамту бағы­тында жур­налистік этика қағидаттарын қалып­тас­ты­рып, жауапкершілікті күшейту үшін респуб­ли­калық және өңірлік БАҚ өкілдерінің, атап айт­қанда журналистердің, блогерлер мен са­рап­шылардың күш-жігерін бір арнада тоғыс­тыру мақсатында 2009 жылы құрылған болатын.

 

Соңғы жаңалықтар

Бүгін - Ұлттық домбыра күні

Қазақстан • Бүгін, 08:50

Ұқсас жаңалықтар