Аймақтар • 18 Мамыр, 2022

«Алматы жастары» өтініштер қабылдайды

39 рет көрсетілді

«Алматы жастары» жеңілдетілген тұрғын үй бағдарламасына өтініштер қабылдау 18 мамырдан басталады. Алматы қалалық тұрғын үй саясаты басқармасы басшысының орынбасары Ермек Әміров пен «Отбасы банкі» АҚ Алматы қаласы бо­йынша филиалының директоры Данагүл Түсіпова өңірлік коммуникациялар қызметінде бағдарламаға қатысу шарттарымен таныстырды.

Алматы қаласында 35 жасқа дейінгі жастарды тұрғын үймен қамтамасыз ету мақсатында биыл­ғы 18 мамыр мен 1 маусым аралығында www.almaty-zhastary.kz сайты арқылы же­ңіл­діктер беруге өтініштер мен «Алматы жастары» бағдар­ла­масы бойынша тұрғын үй не­сие­леріне қатысты құжаттар қа­был­данады. Ермек Әміровтің айтуынша, сайтта өтініштер мен құжаттарды қабылдау электронды цифрлы қолтаңба арқылы жүзеге асады. Автоматты балл қою үшін электронды калькулятор енгізілген. Жеке кабинет арқылы өтініштің барысымен танысуға болады. Құжаттарды қабылдау 1 маусымда сағат 23:59-да аяқталып, 20 жұмыс күні ішінде бағдарлама талаптарына сәйкестігі тексеріледі. Одан кейін әрбір санат бойынша жиналған ең жоғары ұпай санына сәйкес тізім жасалады.

Бағдарламаның бюджетіне 18 млрд теңге қарастырылып отыр. Ал несиенің ең жоғары сомасы – 18 млн теңгеге дейін. Сыйақы мөлшерлемесі – 5, бастапқы жарнасы – 10 пайыз. Қатысушының жаңа салынған немесе қолданыстағы тұрғын үй нарығынан 45 күнтізбелік күн ішінде үй таңдау мүмкіндігі бар. Бағдарламаға қамтылатындар саны 1 мыңға жуық.

Негізгі талаптарға сәйкес, Д.Түсіпованың айтуынша, өті­ніш берушінің және отбасы мүше­лерінің меншік құқығында соңғы бес жыл ішінде тұрғын үйі болмауы шарт. Сонымен бірге қатысушының қаланың денсаулық сақтау, білім беру, мәдениет, спорт, жоғары оқу орындары мен ғылыми-зерттеу институттары, журналистер, әлеу­­меттік сала және құқық қор­ғау органдарындағы ресми жұ­мыс өтілі соңғы алты айдан кем болмауға тиіс. Қалада кемiнде бiр жыл мерзiмге тiркелген жеке кәсiпкерлер де өтініш бере алады. Бұл талап мәдениет саласының өзiн-өзi жұмыспен қамтыған қа­ты­сушыларына қолжетімді.

Жолдама алған өтініш беру­шілердің төлем қабілетін анықтау үшін 15 жұмыс күні ішінде «Отбасы банкі» АҚ кез келген қызмет көрсету орталығына ха­бар­ласады. Былтыр аталған бағ­дарламаға 9 741 өтініш түсіп,
1 019 жас отбасы баспаналы болу бақытына ие болды.

 

АЛМАТЫ

Соңғы жаңалықтар

ТүркПА-ның атауы өзгереді

Парламент • Кеше

Алматы жолдарын су басты

Аймақтар • Кеше

Ұқсас жаңалықтар