TiJi кейіпкерлері қазақ тілінде сөйлейді

Осыған орай Ақпарат және қоғам­дық даму министрі Асқар Омаров «Groupe M6» компаниясының телеар­налар мен радиостанциялар порт­фелін халықаралық дистрибуция­лау жөніндегі директоры Жан-Рене Окутюрье және «Лти Вос­ток» Халықаралық дистрибуция жөнін­дегі бас директоры Мария Жабина-Пантелик және Қазақстан Респуб­ли­касындағы Француз Республикасы Елші­лігінің мәдениет және ынтымақ­тастық мәселелері жөніндегі кеңесшісі Алекс Бортоланмен кездесті. Кездесу бары­сында тараптар балалар үшін қауіпсіз ақпаратты қам­та­масыз етудің маңыздылығына тоқ­талды. 

Сарапшылардың айтуынша, алдын ала жүргізілген зерттеулер мен сауалнамалар нәтижесінде қазақстандық балалардың отандық өнімнен басқа, әсіресе осы TiJi арнасының өнімін көбірек көретінін көрсеткен. Аударма жұмыстары өткен жылы басталып, 70 сағаттық телеөнім мемлекеттік тіл­де дубляждалды. Естеріңізге сала кетейік, бұл жобаның жүзеге асыры­луына 2021 жылы Аида Балаева бас­тамашылық еткен болатын.

Мемлекет басшысы Қасым-Жомарт Тоқаевтың 2022 жылды «Бала­лар жылы» деп жариялағанын атап өткен Асқар Омаров қазіргі ақпараттық ғасырда балалардың қарым-қатынас ортасын қалыптастыруда мультфильмдердің ықпалы зор екенін атап өтті. «Министрлік әлемге танымал мультипликациялық балалар арналарын қазақ тіліне аудару бойынша ауқымды жобаны іске асыруда. Бұл балалардың мемлекеттік тілге деген қызығушылығын арттыруға, сондай-ақ өскелең ұрпақты тәрбиелеуге септігін тигізетініне сенімдімін», деді министр.

Кездесу барысында журна­лис­тердің біліктілігін арттыру, анимация өндірісі және министрлік жетекшілік ететін басқа да салалар бойынша екі­жақты ынтымақтастықты дамыту перс­пективалары талқыланды.

Айта кету керек, балалар теле­ви­зиялық контентін өндірушілерді таң­дау кезінде балалар телеарналарының осындай жобаларды іске асырудағы тәжірибесі және хабар тарату тілде­рінің саны ескерілді. Мәселен, TiJi арна­сының 20 елде 14 түрлі тілде хабар тарату тәжірибесі бар. Телеарна­ның негізгі миссиясы 2-ден 7 жасқа де­йінгі балалар үшін қауіпсіз ақпараттық кеңістікті қамтамасыз ету болып саналады.

«Қазақ тілі – өте бай тіл. Осы тілді кеңі­нен насихаттау мақсатында қазақ­стандық балалар үшін арна құруды қолға алдық. Қазақ балаларына олардың мемлекеттік тілінің да­муына ықпал ететін ойын-сауық және білім беру контентін қалыптас­ты­руды мақсат тұтқан бірлескен бұл жоба – бізді осынау игі іске ынталан­дырды», деп атап өтті Жан-Рене Окутюрье.

Қазіргі таңда қазақ тіліндегі TiJi аудиожолағы Алма ТВ, TV Commerce, Қазақтелеком, Фермата ПРК, Қайнар Медиа (Талдықорған қаласы), Тера­лайн (Нұр-Сұлтан қаласы), ТТК (Те­міртау қаласы) секілді операторларда қолжетімді.