Бизнес • 19 Мамыр, 2022

Биыл прокурорлар 100 мыңға жуық кәсіпкердің құқығын қорғаған

Бизнес пен мемлекет мүддесі арасындағы тепе-теңдікті қатаң сақтау қажет. Бұл туралы Президент Қасым-Жомарт Тоқаев отандық бизнес өкілдерімен кездесуінде айтты, деп хабарлайды Egemen.kz.

Жанболат Кенжеғұл

«Бизнес пен мемлекет мүддесі арасындағы тепе-теңдік қатаң сақталуы тиіс. Ол үшін келесі қадамдарды жасау керек. Бірінші, бақылаушы органдар қызметінің репрессивтік сипатын төмендету жөніндегі жүйелі шаралар талап етіледі. Негізсіз қудалау, құқық қорғау органдарының қысымы әлі де бар деген көптеген дабыл қағылып жатыр», деді Президент.

Оның айтуынша, кейінгі бес айда прокурорлар 100 мыңға жуық кәсіпкердің құқығын қорғаған. Бұл - тұтас 2021 жылғы көрсеткішпен шамалас. Аталған фактілер тергеу органдарының бизнесті қылмыстық қудалауға итермелейтінін білдіреді.

«Бас прокуратура кәсіпкерлік субъектілеріне қатысты бақылау-қадағалау және әсіресе тергеу әрекеттерін заңсыз жүргізу фактілеріне жол бермеуді қатаң бақылауы қажет. Кәсіпкерлерді күдікті ретінде тану тәжірибесі де кең таралған, ал іс жүзінде бұл - жай ғана мүліктік даулар. Қазіргі уақытта кез келген тіркелген өтініш автоматты түрде қылмыстық іс қозғауды білдіреді. Бұл кәсіпкердің қызметін тоқтатады, инвестицияларды тежейді, іскерлік беделге нұқсан келтіреді. Сонымен қатар сотқа дейінгі тергеу ұзаққа созылуы мүмкін. Бұл - кездейсоқтық емес, құқық қорғау органдарының теріс пиғылды қызметкерлерінің мүдделері үшін жұмыс істейтін жүйе. Мұндай мысалдар аз емес», дейді Қасым-Жомарт Тоқаев.

Президент құқық қорғау органдары ең алдымен, алаяқтық фактілерін ашуға, қаражатты жылыстату, заңсыз қолма-қол ақшаға айналдыру, қаржы пирамидаларын құру мәселелеріне баса мән беруі керектігін айтты. Сондай-ақ көлеңкелі экономикамен батыл күресу қажеттігін ескертті.

«Біз азаматтық тексерушілердің қызметін қатаң реттедік. Тәуекелдерді басқару жүйесі, тексеру парақтары, профилактикалық бақылау енгізілді. Неліктен бұл құқық қорғау органдарына қатысты жасалмайды?», деді Мемлекет басшысы.

Күннің маңызды және өзекті жаңалықтарын «Егемен Қазақстан» телеграм каналынан оқыңыз