Пікір • 22 Мамыр, 2022

Еңбектің еленгені жақсы

24 рет көрсетілді

Мемлекет басшысы Қасым-Жомарт Тоқаевтың елі­міздің мәдениет саласында еңбек етіп жүрген өнер май­­талмандарын кәсіби мере­­ке­сімен құттықтауында «Қазақ­­станның халық әртісі» құрметті атағын қайтару керек екенін айтты.

Шын мәнінде, мұндай атақ бұрынғы одақтас басқа рес­публикаларда сақталып қал­ды да, бізде ғана жоқ. Бірақ халық әлі де осындай атақ бар деп ойлайды. Мә­се­лен, мен «Қазақстанның еңбек сіңірген әртісі» атағын 1981 жылы Мұхтар Әуезов атындағы Қазақ мемлекеттік академиялық драма театрында еңбек етіп жүргенде ал­дым. Сол жолы ол атақты 14 актерге берді.Солардың қатарында Құман Тастанбеков, Құдай­берген Сұлтанбаев және ең жасы мен болдым.

Қазір өнер саласында елеу­лі еңбек етіп жүрген белгілі өнерпаздарға «Қазақстанның еңбек сіңірген қайраткері», деген атақ беріледі. Бұл да жақсы. Алайда осы атақты иеленген дарын иесі енді «Қа­зақ­станның халық әртісі» ата­ғын алуға ынталана түседі. Бір жағынан, атақты өнер ада­мы­ның еңбегіне берілген құрмет деп бағалауымыз керек.

Біздің елімізде өнердің қай саласында болсын топ жарған таланттар жетеді. Со­лардың еңбегін дер кезінде көріп, бағалай білсек, оның бағы жанады. Мысалы, өзім театрда жан аямай еңбек етіп жүрг­ен майталмандарды жақсы білемін. Олардың жалақысы да айтарлықтай дей алмаймын. Бірақ солар атақ үшін қызмет істеп жүрген жоқ, өнерді жан-тәнімен сүйеді. Сондай-ақ бейнелеу өнерінің мамандары да үнемі назардан шет қалып қояды. Оларға да бұрынғы «Қазақстанның халық суретшісі», деген атағы қайтарылса дұрыс болады деп ойлаймын.

Шынында да, бұл мәселе көптен көтеріліп келеді. Енді Президенттің тапсырмасымен шешімін тапқаны, өнер адамдарының мерейін асырды. Біз үшін қуанған күн болды. Кейінгі жылдары өнерге деген қолдау, жанашырлықты сезінеміз. Өзім астанадағы Қазақ ұлт­тық өнер университетінде сабақ беремін. Жастар жылында екінші курстың студенттерімен музыка­лық қойылым дайындап, оны Қарағанды, Атырау, Батыс Қазақстан облыстарына гастрольдік сапармен барып қойдық. Жұртшылық жылы қарсы алды. Осыны мен өнер­ге деген қолдаудың бір мысалы деп айтамын.

 

Меруерт ӨТЕКЕШЕВА,

Қазақстанның еңбек сіңірген әртісі

Соңғы жаңалықтар

Шымкентте Қонаев даңғылы ашылды

Аймақтар • Бүгін, 17:58

Алматы маңында жер сілкінді

Аймақтар • Бүгін, 16:42

Алматыда үшінші вокзал салынады

Аймақтар • Бүгін, 14:59

Доллар арзандады

Экономика • Бүгін, 14:08

Ұқсас жаңалықтар