Әлем • 23 Мамыр, 2022

Маймылшешек ауруы әлемнің 14 еліне тарады

1415 рет
көрсетілді
1 мин
оқу үшін

Израиль мен Швейцарияда маймылшешек ауруын жұқтырудың алғашқы оқиғалары расталды. Бүгінде ауру анықталған елдер саны 14-ке жетті. Бұл туралы BBC ақпарат агенттігі хабарлады, деп жазады Egemen.kz.

Маймылшешек ауруы әлемнің 14 еліне тарады

Екі елде де ауруды бірінші жұқтырғандар жақында ғана шетелден келген. Израильде инфекцияның бірнеше жағдайы зерделену үстінде. Маймылшешек ауруы Орталық және Батыс Африкада жиі кездеседі. Бұл аймақтан тыс жерде оның қоздырғышын көбінесе сол жерде болған адамдар мен жануарлар тасымалдайды.

АҚШ, Канада, Австралия және Еуропада маймылшешегінің жаңа жағдайлары зерттелуде. Осы аптада АҚШ, Канада, Испания, Португалия, Ұлыбритания, Франция, Италия, Швеция және Австралия билігі де өз аумағында аурудың өршуін растады.

Агенттік мәліметінше, әлемде инфекцияның 80-ге жуық жағдайы расталған. Ал Дүниежүзілік денсаулық сақтау ұйымының айтуынша, маймылшешегін жұқтырды деген күдікке ілінген 50 жағдай анықталған. Бірақ қай елде анықталғаны аталмай отыр. Ұйым ауру санының әлі де артатынын ескертті. Ғалымдар індеттің осынша қарқынды таралатынын күткен жоқ, десе де маймылшешек адамнан адамға оңай жұқпайды.

Британдық денсаулық сақтау қызметінің мәліметінше, ауру әдетте жеңіл өтеді, адамдардың көбі бірнеше апта ішінде сауығып кетеді.