Білім • 24 Мамыр, 2022

Ұстаздың аты өлмейді

366 рет
көрсетілді
1 мин
оқу үшін

Қарқаралы қаласындағы Орын­­бек Жәутіков атындағы №1 мектепке ұлағатты ұстаз Күләнда Нұрболқызының бала­­лары көп­бейінді микроскоптармен, аспап­тармен және интерактивті тақтамен жаб­дықталған заманауи биология кабинетін сыйға тартты.

Ұстаздың аты өлмейді

Аталған мектептегі биология пәні­нің мұғалімі Гүлмайра Әубәкірова сыныптың 2007 жылы ашылып, оған Күлән­да Нұрболқызының есімі беріл­генін айтады.

– Күләнда Нұрболқызы өткен ғасыр­дың 60-жылдары біздің мектепте жұмыс істеп, химия және биология пәндерінен сабақ берді. Пара­сатты жан, білікті педагог жайын­дағы естеліктер әлі күнге дейін оның оқу­шылары мен әріптестерінің жүрегінде сақталып қалған. Ұлағатты ұстаздың балалары бізге жыл сайын жөндеу жұмыстарына көмектесіп тұрады. Ал биыл олар күр­делі жөндеу жүргізіп, жаңа жиһаз бен құ­рылғылар алып берді, – дейді Г.Әубә­кірова.

Бүгінде жаңартылған биология сыныбында барлық қажетті техника мен аспаптар ғана емес, адам ағзасы құрылымының макеттері де бар. Көп атқарымды тақта микроскоптарға қосыл­ған. Мұның өзі балалармен бірге тә­жірибе жүргізуге және іс жү­зінде оларға күрделі тақырыптарды тү­сіндіруге мүм­кіндік береді.

Жаңартылған сыныптың ашылу сал­танатына Күләнда Нұрбол­қызының Мәжілісте депутат болған ұлы, қоғам қайраткері Рауан Шаекин бастаған балалары, сондай-ақ бір топ шәкірттері және аудан әкімі Ерлан Құ­сайын қатысып, еңбек сіңірген педагог жайлы жан тебірентер естеліктер айтты.

Айта кеткен жөн болар, 883 бала білім алатын О.Жәутіков атындағы мектепте барлық қажетті техникалық оқыту құралдары мен дидактикалық материалдармен қамтамасыз етілген био­логия пәнінің екі бірдей кабинеті бар.

 

Қарағанды облысы,

Қарқаралы қаласы

Соңғы жаңалықтар

Су үнемдейтін қондырғы

Технология • Кеше