Өңірде түрлі олимпиадалық ойындар, өнер жарысы мен зияткерлік кездесулер өтуде. Сондай-ақ Әулиеата өңірінің ішкі туристік әлеуетін дамыту әрі тиімді жобаларды жүзеге асыру мақсатында облыстық туризм басқармасы Тараз қаласының тұрғындары мен қонақтарына арналған экскурсиялық тур ұйымдастырды. Енді тур аясында тараздықтар төрт ай бойы көне шаһардың тарихи-мәдени ошақтарына саяхат жасайды. Олар екі мың жылдан астам тарихы бар Тараз қаласының көрнекті жерлеріне барады.
Тараз қаласының өзінде тарихи-мәдени ескерткіштер мен киелі орындар жеткілікті. Бұл орайда өңірге келуші туристер де көне шаһардың тарихына ерекше қызығушылық танытуда. Ал аталған іс-шараға арнайы экскурсиялық автобус ұйымдастырылып, келушілер қаладағы «Көне Тараз» тарихи-археологиялық саябағы, «Қарахан», «Дәуітбек», «Айша бибі», «Бабаджа хатун» кесенелері, Ерте Ислам дәуіріндегі жерасты мешіті, «Тектұрмас» этнотарихи кешені және «Қазақ хандығы» монументі сияқты тарихи-мәдени орындарға саяхат жасауда. Бұл саяхаттан мүмкіндігі шектеулі және ата-анасының қамқорлығынсыз қалған балалар да тыс қалмады. Олардың қаланы еркін аралауына еріктілер де көмек көрсетуде. Сондай-ақ экскурсия аясында туризм саласында еңбек етіп жүрген мамандар мен балалар арасында ашық диалог өрбіді. Мамандар балаларға Тараз жеріндегі тарихи құндылықтар жөнінде толық мәлімет беріп, сан ғасырлар бойы жасап келе жатқан тарихи құндылықтарды қастерлеу әр азаматтың борышы екенін жеткізді. Алдағы уақытта да өңірдегі балалар үшін мұндай іс-шаралар жалғасын табады.
Жамбыл облысы