Саясат • 01 Маусым, 2022

Саяси жүйені реформалау ісі жалғасады

214 рет
көрсетілді
3 мин
оқу үшін

Парламент Сенатының Төрағасы Мәулен Әшім­баев Түркістан облысында жергілікті тұрғындармен кездесті. Кездесу барысында конституциялық реформаның мәні мен маңызы кеңінен сөз болды.

Саяси жүйені реформалау ісі жалғасады

Сенат Спикерінің сапары Қожа Ахмет Ясауи кесенесіне зиярат етумен басталды. Ол жерде сенаторлар саяси қуғын-сүргін және ашаршылық құрбан­дарының рухына тағзым етіп, дұға жасады. Ал өңірдің зия­лы қауымымен кездесуде Мем­лекет басшысының бастамасы­мен елімізде жүргізіліп жатқан саяси реформалар талқыланды. Жиынға сондай-ақ сенаторлар Әли Бектаев, Айгүл Қапбарова, Әлімжан Құртаев қатысты. Тари­хи сананы жаңғырту мәселесіне назар аударылған жиында Сенат төрағасы соңғы жылдарда бел­сенді жүргізіліп келе жатқан ашар­шылық тақырыбын зерттеу жұ­мы­старының маңызды екенін, осы бастаманы республикалық және өңірлік деңгейде жал­ғас­тыру керек екендігін айтты. «Ашар­шылық тақырыбына арналған жұмыс­тарды әрі қарай жалғас­тырудың маңызы зор. Бұл бірінші кезекте, тарихи санамызды жаңғырту үшін қажет. Ал тарихи сананы жаңғырту дегені­міз – Тәуелсіздікті нығайту, елдік­ті еңселі ету және ұлттық құн­ды­лық­тарды дәріптеу жолын­дағы негізгі қадамдардың бірі», деді Мәулен Әшімбаев.

Сонымен қатар Сенат Төраға­сы ел Президентінің бастама­сы­мен қолға алынған саяси рефор­маларға тоқталды. Конституцияға енгізу үшін ұсынылған түзетулер мен алдағы референдум еліміздің саяси жүйесін ғана емес, басқа да салаларды дамытуға берік негіз қалайтынын атап өтті. «Конституциялық реформа билік монополиясын болдырмауға және саяси бәсекені дамытуға жол ашады. Бұл бастамалардың бәрі Қазақстанды демократиялық, құқық­тық, әділетті және әлеумет­тік мемлекет ретінде нығайтуға бағытталған. Осы жолдағы жұмыстар Конституцияға өзгеріс­тер енгізумен тоқтамайтыны белгілі. Алдағы уақытта да сая­си жүйемізді реформалау ісі жалғаса береді», деді Сенат Төрағасы.

Ал Қожа Ахмет Ясауи атын­дағы Халықаралық қазақ-түрік уни­­верситетінің оқытушы-профессорлар құрамымен және студенттерімен кездесуде Мәулен Әшімбаев конститу­циялық реформаның негізгі бағыт­тары туралы айтып, жас­тар­дың сұрақтарына жауап берді. Кездесуде Сенат Төрағасы ХХІ ғасыр білім мен ғылым­ның дәуірі екенін, осы орайда жастарға қойылатын талап та өзгеретінін айтып өтті. Жас­тарды үнемі білімін жетіл­діріп отыруға шақырды. Сондай-ақ адамның бойындағы сыни көзқарас, ойлау жүйесін дамыту сынды қасиеттердің маңы­зына тоқталып, өз кеңесін берді. «Қазіргі таңда білім алу өмір­лік процеске айналды. Бү­гінде жай ғана сауатты болу жет­кіліксіз. Университет қабырғасында бакалавр немесе магистр дәрежесін иелендім деп те тоқмейілсуге болмайды. Әрдайым ізденісте болу қажет. Өзіңді үздіксіз жетілдіріп отыру – жетістіктің негізі», деді Мәулен Әшімбаев.

Кентау трансформатор зауы­тының ұжымымен және өңірдегі бір топ әлеумет­тік кәсіпкермен кездесуде Сенат Төрағасы саяси реформа­лар­дың маңызына назар аударды. Аймақтағы өзекті мәсе­лелер, аталған салаға қатысты түйткілдер де жан-жақты талқы­ланды. Мәулен Әшімбаев айтыл­ған пікірлер мен ұсыныстар тиісті мемлекеттік органдар тарапынан пысықталып, Парламенттің заң шығару жұмысында ескерілетінін жеткізді.

 

Түркістан облысы