Халықаралық балаларды қорғау күні қарсаңында ұйымдастырылған көрмеге бастауыш сынып оқушылары, ата-аналар қауымы қатысты. Кітапхананың саялы саябағында өткен шарада автордың осы уақытқа дейін түсірген балалардың бақытты әрі қызықты сәттерінен үздік туындылар көрермен назарына ұсынылды.
– Кішкентай балалар суретке түсуде түрлерін жасанды етпейді. Күлсе де риясыз, шынайы күледі. Соңғы жылдары балалардың осындай бақытты да қайталанбас сәттерін бақылап жүріп, суретке түсірдім. Нәтижесі міне, халыққа көрме ретінде ұсынып отырмын, – дейді облыстық «Didar» газетінің фототілшісі Тілеубек Шаяхмет.
Фототілшінің әуелгі мақсаты – Шығыста фотоөнерді дамыту. Айтуынша, ең жедел ақпарат фото мен бейнеролик. Сондықтан да осы салаға мән беруіміз керек деп есептейді.
«Біздің болашақ» атты алғашқы жеке фотокөрмесінде автор қатысушылар тарапынан қойылған сұрақтарға жауап беріп, шеберлік сағаты арқылы фотоға түсудің және түсіре білудің құпияларымен бөлісті. Сондай-ақ фотограф кітапханаға Өскеменнің көрікті жерлері мен әртүрлі мереке күндерінде түсірілген фотосуреттер жинағын сыйлады.
Көрікті көрме алдағы уақытта Өскемендегі Металлургтер саябағында, Арбатта жалғасын табады. Фототілшінің жоспарына құлақ түрсек, көрме балалар күнімен ғана тоқтап қалмайды, алдағы мереке-мейрамдарда да тақырыптық көрмелер ұйымдастыруды жоспарлап отыр. Мәселен, әр мамандықтың мерекесі қарсаңында фотосурет арқылы сол жұмыстың қызығы мен шыжығын суретке тартып, халық назарына ұсынуды көздейді.
Шығыс Қазақстан облысы
