![Балалар жылы аясындағы іс-шараларға 48,3 млрд теңге бөлінген](/media/2022/06/01/crop-10_16_763x1170_2020_09_21_03aeaf06af035780dc901ab8a3f28adf-750x500.jpg)
Үкімет басшысының айтуынша, балалар мерекесіне сәйкес келген бүгінгі Үкімет отырысында Мемлекет басшысының Жарлығымен жарияланған «Балалар жылын» өткізу мәселесі талқыланған.
«Биыл «Балалар жылы» аясында көптеген іс-шаралар жоспарланып, жүзеге асырылуда. Бұл мақсатқа мемлекеттік қазынадан жалпы сомасы 48,3 млрд теңге бөлінді. Олардың барлығы нақты орындалуы тиіс. Ең бастысы – балаларымыздың қауіпсіздігін қамтамасыз ету», деп жазды Премьер-Министр.
Сондай-ақ ол облыс әкімдіктеріне әлеуметтік жағынан аз қамтылған отбасылардың балаларын сауықтыру шараларымен қамтуды, олардың жазғы демалыста бос уақытын пайдалы өткізу мәселесіне көңіл бөлуді тапсырғанын да атап өтті.
Премьер-Министрдің айтуынша, ауылдық жерлерде спорт алаңдары мен балаларды дамыту орталықтары жабдықталуы тиіс.
«Денсаулық сақтау министрлігі шалғай елді-мекендердегі балалардың денсаулық жағдайына скринингтік және стоматологиялық тексерулер жүргізу үшін жылжымалы медициналық пункттердің жұмысын ұйымдастыратын болады», деді Үкімет басшысы.
Сонымен қатар балалардың құқығын сақтауға, экскурсиялық-танымдық іс-шаралар ұйымдастыруға, оларды түрлі үйірмелермен және секциялармен қамтуға қатысты бірқатар тапсырмалар берді.
Алихан Смайловтың жазбасында барлық өңір әкімдері «Балалар жылына» арналған іс-шаралардың орындалуын жеке бақылауында ұстауы тиістігі де айтылған.
«Адамның бір қызығы – бала деген» деп ақынымыз Абай айтқандай, балалардың білім алып, оларға жан-жақты қамқорлық жасау, құқықтарын қорғау – мемлекеттің маңызды міндеті. Сондықтан кешенді іс-шаралардың барлығы менің тұрақты бақылауымда болады», деді Әлихан Смайылов.
Аяна Тоғанбек