Аталған додада Нұрқанат Серікбаевтың асқан шеберлігіне тәнті болдық. Аса жеңіл салмақта сайысқа түскен ол барлық қарсыласының аяғын көктен келтірді. Тіптен ақтық сында да Нұрқанат өз қарсыласына бас көтерткен жоқ. 66 кило салмақтағы Нұрсұлтан Зайзағалиевтің де қарқынына ешкім төтеп бере алмады. Қарсы келгендерді алып та, шалып та жыққан ол алтын тұғырдан қол бұлғады. Мерей Марханбетов (60 кило) пен Аида Тойшыбекованың (+78 кило) да дәл сол межеден көрінуге жақсы мүмкіндіктері болды. Алайда финалда олар есе жіберіп, күміс медальды қанағат тұтты. Ал Есмигүл Куюлова (63 кило) мен Максим Мейірлан (81 кило) қола медальға қол созды.
Осылайша, еліміздің жас дзюдошылары қатарынан екінші халықаралық турнирден олжалы оралды. Осының алдында ғана олар Испанияның Малага қаласында өткен жарыстан үш жүлдемен оралған еді.
