Суретті түсірген Тілеубек Шаяхмет
Іс-шараның негізгі мақсаты – 2021-2022 оқу жылының қорытындысын шығару, жалпы білім беретін пәндер бойынша республикалық олимпиада жеңімпаздары мен жүлдегерлерін, дарынды оқушыларды марапаттау еді. Жүзден жүйрік шыққан білімді оқушыларға бұл күні облыс әкімінің атынан арнайы алғысхаттар мен бағалы сыйлықтар табысталды. Форумда Шығыс Қазақстан облысы білім басқармасының басшысы Сайрангүл Ахметкәрімқызы үлгілі де үздік оқушыларды мерекесімен құттықтап, жылы лебізін білдірді.
– Дарынды жастар – кез келген мемлекеттің мақтанышы. Елдің жарқын болашағы олардың білімі мен жаңа идеяларына байланысты. Ал балалардың жетістіктері өңірдің имиджі мен беделін арттырады, – деді облыстың бас ұстазы Сайрангүл Жұмаділова.
Айта кетсек, облысымыздың зияткерлік құрама командасы биыл жалпы білім беретін пәндер бойынша оқушылардың республикалық олимпиадасында 30 медаль жеңіп алған. Оның ішінде 8-і алтын медаль. Сонымен қатар форум аясында республикалық олимпиаданың жеңімпаздары мен жүлдегерлеріне Қазақстан Республикасы Білім және ғылым министрлігінің медальдары мен дипломдары берілді.
– Жетістікке жету оңай емес. Халықаралық, Еуразиялық олимпиадаларда орын алдым. Жуықта жеткен тағы бір жетістігім APhO Азия олимпиадасында марапатқа ие болдым. Қандай да дәрежеге жету үшін ең бірінші табанды еңбек ете білу керек, – дейді Семей білім-инновация лицейінің 11-сынып оқушысы Мұхамедкәрім Қаныш.
Мерекелік форумнан алған әсерлерімен бөліскен оқушылар ұйымдастырушыларға алғыстарын білдірді, артылған үмітті ақтау үшін білім жолында еңбек етуге уәде етті. Жоғарыда айтып өткендей, салтанатты шарада бейбіт күнде жасаған ерліктерімен көзге түскен оқушылар да болды. Оның бірі сыныптасының өмірін құтқарып қалған Руслан Омаров еді. Ол мамыр айында суға батып кеткен сыныптасын жағаға алып шығып, алғашқы көмек көрсеткен.
– Сыныптасым судың терең жеріне түсіп кетті. Сөйтсек, ол жүзе алмайды екен. Батып бара жатқанын байқай сала суға секірдім. Оның үстіне су да суық екен. Жүзіп барып, жағаға шығардым. Кейін досым алғыс айтып, өзінің велосипедін сыйлады, – дейді 7-сынып оқушысы Руслан Омаров.
Марапаттау рәсімінен соң күміс көмей, жезтаңдай әншілер озат оқушылардың құрметіне әсем ән арнады. Мерекелік шара аяқтала сала құшақтары гүлге толған оқушыларын ұстаздары да құттықтап, ақ тілектерін жаудырып жатты. Рас, ұстаздан шәкірт озып жатса, ұстаз еңбегінің ақталғандығы. Ал білімде жүлдегер атанып жүрген оқушылар ертеңгі күні үлкен өмірде де жүлдеге жетері сөзсіз.
Шығыс Қазақстан облысы
