Аталған жарыста Қазақстанның намысын бес спортшы қорғайды. Олар – Милад Карими, Нариман Құрбанов, Ілияс Әзизов, Фарух Набиев және Дмитрий Патанин. Осы бестіктің арасындағы ең үздігі Карими екені сөзсіз. Ол 2017-2019 жылдары өткен Азия чемпионатында жүлдегерлер санатынан көрініп, Дүниежүзілік универсиадада күміспен күптелді. Құрбанов та Неапольдағы студенттердің басты додасында екінші орынға табан тіреді. Милад пен Нариман Әлем кубогының кезеңдік сайыстарында да елеулі табыстарға қол жеткізіп жүргені мәлім. Сондай-ақ Әзизов, Набиев және Патанинді де осал деп айта алмаймыз. Олар да бірқатар халықаралық жарыста жеңіс тұғырына көтерілген.
Осы жарыстың қорытындысы бойынша биылғы жылдың 28 қазан мен 6 қараша аралығында Англияның Ливерпуль қаласында өтетін әлем чемпионатында өнер көрсететін гимнасшылар анықталады.
