«Даму» кәсіпкерлікті дамытады

«Даму» кәсіпкерлікті дамыту қоры» АҚ өңдеуші өнеркәсіптегі шағын және орта бизнес субъек­тілерін қаржыландыру үшін 100 миллиард теңгені орналастыру туралы екінші деңгейлі банк­термен несие келісіміне қол қойды. Бұл жайында Президент жанындағы Орталық коммуникациялар қызметінде өткен кезекті брифингте «Даму» кәсіпкерлікті дамыту қоры» АҚ басқарма төрайымы Ләззат Ибрагимова әңгімеледі. Несие келісімі «Даму» кәсіп­керлікті дамыту қоры» АҚ пен 13 отандық екінші деңгейлі банктер арасында 2 пайыз мөлшерлемемен 20 жыл мерзімге дейін жасалған. Құжатқа сәйкес аталған қаржыны екінші деңгейлі банктер өңдеуші өнеркәсіп жобаларын іске асыратын шағын және орта бизнес кә­сіпкерлеріне алты ай ішінде берулері тиіс. Банктер шағын және орта бизнес кәсіпорындарын өнеркәсіпті дамыту бағдарламасы бойынша несиелендіреді. «Банктерге осы бағдарлама аясында қандай да бір комиссия, айыппұл, өсімпұл түрлерін алуға тыйым салынады және бұл қаржы Ұлттық қордың ресурстары болғандықтан, олар отандық тамақ, тоқыма, металлургия және машина жасау өнеркәсіптеріне беріледі. «Даму» қоры шағын және орта бизнес өкілдері несиені қарастыруға артық комиссия төлемес үшін барлық процедураларды егжей-тегжейлі бақылайды. Сонымен қатар, біз банктерді ынталандырамыз. Оларға ортақ қаржыландыру көрсетіледі және жобаларға басқа да қосымша ресурстар тартатын боламыз», дейді «Даму» кәсіп­керлікті дамыту қоры» АҚ бас­қарма төрайымы Ләззат Ибра­гимова. Бұл игі шара Мемлекет бас­шысының экономикаға қолдау көрсету мен оның өсімін 6-7 пайыз деңгейінде қамтамасыз ету туралы тапсырмасын іске асы­рудың алғашқы қадамы. Осы қаражатты бөлу шағын және орта бизнестің жаңа жобалары бойынша инвестициялық қыз­меттерін ынталандырады. Сондай-ақ, кәсіпкерлерге несие­лерін аса тиімді шарттармен қайта қаржыландырып, тұрақты жұмысын жалғастыруға және өндірістік қызметін іске асыруға мүмкіндік туғызады. Әбдірахман ҚЫДЫРБЕК, «Егемен Қазақстан».