![Ұлттар лигасы: Қазақстан Словакияны жеңді](/media/2022/06/13/photo_100743.jpeg)
Бұған дейін қазақстандықтар өз тобында 7 ұпаймен көш бастап келе жатқанымен, екінші орындағы словакиялықтар негізгі фаворит еді.
Өз алаңында Қазақстанға 0:1 есебімен есе жіберген Словакия елордаға қалайда қарымта қайтару үшін келген еді. Бұл ойында құрамаға оралған Асхат Тағыберген капитандық тізгінді қайта қолға алды. Ал Исламбек Қуат екі рет ескерту алғандықтан, матчтан тыс қалды.
Бірінші таймда 18-минутта оң қапталдағы Михаил Габышевтан пас алған Ян Вороговский есеп ашты. 31-минутта Я.Вороговскийдің тағы бір гол соғатын мүмкіндігі болды. Есесіне 39-минутта тағы да оң қапталдан А.Тағыберген берген допты Эльхан Астанов баспен торға дәл түсірді. Бұл Э.Астановтың ұлттық құрамадағы алғашқы голы еді.
Екінші таймда 51-минутта словакиялық Матуш Бероның айып алаңына кірместен, тепкен добы голға айналды – 1:2. Бұдан кейін Игорь Шацкий екі мәрте өз қақпасын аман алып қалды. 87-минутта дөрекі ойнаған словакиялық Ондрей Дуда алаңнан қуылды.
Осылайша, қарсыласын 2:1 есебімен тізе бүктірген Қазақстан құрамасы ұпай санын 10-ға жеткізді. Ресейлік маман Магомед Адиев жаттықтырғаннан бері қазақстандықтар төрт кездесуінде үшеуінде жеңіске жетті. Бұл – тамаша нәтиже.
Қазақстан құрамасы қалған ойындарын қыркүйек айында өткізеді. 22 қыркүйекте Беларусьты қабылдаса, үш күннен кейін сырт алаңда Әзербайжанмен кездеседі.
Еске сала кетейік, бұдан бұрын футболдан Ұлттар лигасында Словакия командасы Әзербайжанды ұтқанын жазған болатынбыз.
Сондай-ақ Қазақстан – Словакия кездесуіне төрешілер белгіленді.