Қазіргі таңда Мәдениет және спорт министрлігі Қазақстанның ЮНЕСКО және ИСЕСКО істері жөніндегі Ұлттық комиссиясы жанындағы Материалдық емес мәдени мұралар жөніндегі ұлттық комитет сарапшыларының қатысуымен ЮНЕСКО-ның адамзаттың материалдық емес мәдени мұрасының репрезентативтік тізіміне қазақтың халық биі «Ортекені» енгізу бойынша жұмыстарды жүргізуде.
Айта кетейік, «Ортеке» халық биінің қуыршақ теке, бишілер тобы, жеке биші орындайтын үш түрі бар. Көпшілікке ұсынылған бейнероликте қуыршақ теке нұсқасы беріліп отыр. Ал биді орындаушы – Нұр-Сұлтан қаласы әкімдігінің Еркеғали Рахмадиев атындағы Мемлекеттік академиялық филармониясының «Қорқыт» этноансамблі мен SHOLPAN KORGANBEK өнер студиясының жас музыканттары (көркемдік жетекшісі Шолпан Қорғанбек).
