Қытай делегациясы еліміздің мемлекеттік қызмет моделімен танысады

АСТАНА. 24 сәуір. Бүгін Астанада Мемлекеттік қызмет істері жөніндегі агенттік төрағасы Әлихан Байменов пен Қытай Халық Республикасы Адам ресурстары және әлеуметтік сақтандыру министрінің орынбасары Ян Щицю кездеседі. Бұл туралы Мемлекеттік қызмет істер жөніндегі агенттіктің баспасөз қызметі хабарлады. Кездесу барысында Қазақстан тарапынан мемлекеттік қызмет саласындағы жаңа модельдің жай-жапсары ұсынылмақ. Дәлірегі, Қытай делегациясы «А» корпусының қалай қалыптасқанымен, мемлекеттік қызметкерлерге қойылатын талап деңгейімен, олардың жұмыс істеу мәнерімен, сондай-ақ, осы бағытта құрылған ақпараттық-талдау порталының, электронды кітапхана мен аймақтық журналдың жұмысымен таныс болады. Екі жақты кездесу соңында Мемлекеттік қызмет істері жөніндегі агенттік пен Қытай Халық Республикасы Адам ресурстары және әлеуметтік сақтандыру министрлігі арасында өзара келісім меморандумына қол қойылады. Бұл құжатта екі елдің мемлекеттік қызметкерлерінің тәжірибе алмасуы, арнайы бағдарлама бойынша кәсіби оқыту ісін жолға қою сынды мәселелер қамтылады деп күтілуде. Сонымен қатар, Қытай делегациясының ресми сапары барысында Мемлекеттік қызмет істері агенттігі мен мемлекеттік органдардың кадрлық қызметін автоматтандыру, халықаралық тәжірибеге сәйкестендіру үшін құрылған«е-қызмет» жүйесінің мақсаты және мемлекеттік қызмет аясында орныққан аймақтық хабтың бүгінгі деңгейі әңгіме арқауына айналмақ. Жолдыбай Базар. Дереккөз: Мемлекеттік қызмет істер жөніндегі агенттіктің баспасөз қызметі. Фото: Liter.kz.