Қазақстан мен Люксембург СІМ басшылары екіжақты және көпжақты, оның ішінде ҚР-ЕО, ЕО-Орталық Азия форматындағы ынтымақтастықтың перспективаларын талқылады. Тараптар ынтымақтастықтың барлық өзекті мәселелері мен халықаралық күн тәртібіндегі мәселелерге тоқталды. Сондай-ақ үкіметаралық және парламентаралық байланыстарды одан әрі дамытуға жәрдемдесу туралы уағдаласты.
ҚР Конституциясына өзгерістер енгізу бойынша өткен жалпыұлттық референдумға ерекше көңіл бөлінді. Люксембург тарапы Қазақстан Президентінің реформаларына қолдау білдіріп, олардың имплементациясы еліміздің саяси жаңғыруына ықпал ететінін атап өтті.
Екі елдің сыртқы саяси ведомстволарының басшылары Қазақстан мен Люксембург арасында дипломатиялық қарым-қатынастардың 30 жылдығына байланысты бірлескен коммюнике қабылдау туралы уағдаласты.
Кездесу Люксембург Ұлттық күні қарсаңында өтті. Осыған орай, ҚР СІМ басшысы Қазақстан Президенті Қасым-Жомарт Тоқаевтың Люксембург Ұлы герцогі Анриге жолдаған құттықтауын жеткізді.
Францияның сыртқы саяси ведомствосының басшысы Катрин Колоннамен кездесу барысында өзара қызығушылық тудыратын кең ауқымды мәселелер бойынша Парижбен стратегиялық әріптестікті тереңдету жөніндегі одан арғы қадамдар талқыланды.
Министр М.Тілеуберді француз әріптесін биылғы Еуропалық одақтағы төрағалығының табысты аяқталуымен құттықтап, Қазақстанның Кеңейтілген әріптестік пен ынтымақтастық туралы келісімде, сондай-ақ ЕО-ның Орталық Азияға арналған стратегиясында белгіленген барлық салаларда ынтымақты арттыруды жалғастыруға деген ниетін атап өтті. Франция Қазақстанның негізгі серіктестерінің бірі және еліміздің Еуроодақпен өзара іс-қимылының дәнекері.
Тараптар жоғары және аса жоғары деңгейдегі алдағы іс-шаралар кестесін қарап, сыртқы саяси ведомстволар арасындағы тұрақты байланысты жалғастыруға келісті.
Сауда-экономикалық және инвестициялық ынтымақтастықты, атап айтқанда энергетика, ауыл шаруашылығы, көлік және инфрақұрылым, цифрлық технологиялар сияқты салаларды дамытуға ерекше назар аударылды.
Қазақстандық тарап білім, денсаулық сақтау, ғылым және мәдениет саласындағы екіжақты байланыстарды нығайтуға қызығушылық білдірді.
Сондай-ақ министрлер 17 маусымда Парижде өткен қазақстан-француз саяси консультацияларының 9-шы раундының табысты өткенін құптады.
