Қабылдауда болған Ақмола облысына қарасты Егіндікөл ауылының тұрғыны Светлана Гурбанова сумен жабдықтау кезінде туындап отырған мәселелер туралы айтты. «Су мәселесі бұрыннан шешілмей келеді. Ауылда ұңғыма да, құдық та жоқ, бар үмітіміз тек Нұра каналында. Мұндағы жағдай қиын, аудан жойылудың аз-ақ алдында тұр. Адамдардың көбі бұл жерден көшіп кетпек, сусыз қалай өмір сүреді? Осы мәселе өткен жылы, біз жаз бойы сусыз отырған кезде шегіне жетті. Аптасына 1-2 рет су алып келіп, әр үйге шамамен 200-250 литрден береді. Бірақ барлығында бірдей суды ұзақ уақыт сақтайтын бөшке де жоқ», деді ол.
Бұл сұраққа жауап берген Экология министрлігі Су ресурстары комитетінің төрағасы Нұрлан Алдамжаров биыл жобалық-сметалық құжаттама әзірленетінін, ал Нұра топтық су құбырын жөндеуге 2023 жылы кірісетіндерін жеткізді. Маңғыстау облысының Оңды ауылынан хабарласқан Басшы Көбентаев та елді мекендегі су мәселесін көтерді.
Батыс Қазақстан облысына қарасты Подстепное ауылының тұрғыны Баян Төлеутаева ауыл балаларының әлі күнге дейін үш ауысымда оқуға мәжбүр екенін алға тартып, жобалық-сметалық құжаттамасы дайын жаңа мектеп құрылысын барынша жылдамдатуды сұрады. «Ауылымыз Оралдан 12 шақырым жерде орналасқан. Халық саны 15 мыңға жетті. Жыл сайын 1-сыныпқа баратын балалардың саны артып келеді», деді ауыл тұрғыны.
Өз кезегінде Қостанай қаласынан келген Айымгүл Ахметова денсаулық сақтау жүйесінде жұмыс істейтін, бірақ медициналық қызметкерлер қатарына кірмейтін тәрбиешілерді педагогтерге теңестіру қажет деп есептейді. Бұл осы саладағы еңбекақы мөлшерін арттыруға мүмкіндік береді. Ал қазақстандық бірыңғай стоматологтар қауымдастығының президенті Назым Бектұрғанова балалар мен жүкті әйелдерге профилактикалық стоматологиялық қызмет көрсету бойынша мемлекеттік бағдарлама әзірлеуді ұсынды.
Көкшетау қаласының тұрғыны Фарида Көшенова «Бақытты отбасы» ипотекалық бағдарламасына жетім балалар санатын қосуды сұрады. Бұған жауап ретінде Құрылыс және тұрғын үй-коммуналдық шаруашылық істері комитетінің төрағасы Тимур Қарағойшин мұндай өзгерістер Үкімет қаулысымен бекітілгенін, жоба қазір мемлекеттік органдарда келісу сатысында екенін атап өтті.
Павлодарлық кәсіпкер Виктор Пряхин ғимараттарды пайдалануға беру кезінде жиі тіркелетін келеңсіздіктерге тоқталды. «Кез келген нысанды пайдалануға беру кезінде әлеуметтік қорғау органы жүріп-тұруы шектеулі адамдар үшін ыңғайлы болуын қамтамасыз ету бөлігіне сәйкес келетіні туралы декларацияны келіседі. Алайда бұл декларацияны келісудің нақты алгоритмі мен мерзімі жоқ. Осы функцияны мемлекеттік қызметтер тізіліміне қосып, арнайы стандарт әзірлеуді сұраймыз», деді ол. Ал алматылық экобелсенді Сергей Снегирев жануарларға жауапкершілікпен қарау туралы заң нормаларының орындалуына қоғамдық бақылау жүргізу жобасын іске қосуды ұсынды.
Партияның атқарушы хатшысы қабылдау кезінде айтылған әр өтініш бойынша бірқатар нақты тапсырма беріп, сұрақтардың басым бөлігін жеке бақылауына алды.
«Халық үніне құлақ асатын мемлекет» тұжырымдамасын іске асыру аясында, партия билік пен азаматтар арасындағы көпір болуы тиіс. Олар әділдік іздеп, бізге келеді. Бірде-бір өтініш назардан тыс қалмайды», деп атап өтті А.Оралов.
Айта кетейік, партияның қоғамдық қабылдау бөлмелеріне жыл басынан бері 65 мыңнан астам адам жүгінген. Тұрғындарды негізінен әлеуметтік қамсыздандыру (30%), тұрғын үй-коммуналдық шаруашылық (16%), тұрғын үймен қамтамасыз ету және жер учаскелерін бөлу (11%) мәселелері толғандырады. Мемлекеттік органдардың басшылары мен түрлі деңгейдегі депутаттар 13 мыңнан астам қабылдау өткізіп, 36 мың адамның талап-тілегі тыңдалды. «Мобильдік қоғамдық қабылдаулар» жобасы аясында 4 ай ішінде партиялықтар еліміз бойынша 578 ауылды аралап, 5 мыңға жуық азаматты қабылдады.
