Сенатор Ерік Сұлтанов заң жобасында қарыз шартында белгіленген мерзімде мемлекеттік Сыртқы қарыз қаражатын игермегені үшін әкімшілік жауапкершілік енгізу көзделгенін хабарлады.
«Бұл жауапкершілік бюджеттік бағдарламаның бірінші басшысына жүктеледі. Бұл түзетулер бюджет заңнамасының жауапкершілігін күшейтуге, сондай-ақ республикалық бюджетті тиімді пайдалануға бағытталған». дед ҚР Парламенті Сенатының депутаты Ерік Сұлтанов.
Сенатор Сұлтанбек Мәкежанов түзету қажеттілігін дәлелдей отырып, аудиторлық іс-шараларды жүргізу барысында жыл сайын тиімсіз жоспарлау мен бюджет қаражатын пайдаланбаудың көптеген фактілері анықталатынын хабарлады.
«2019 жылы әлеуметтік-экономикалық міндеттерді шешуге бөлінген бюджет қаражатын тиімсіз жоспарлау мен пайдалану сомасы 1 трлн 400 млрд теңгені, 2020 жылы - 1 трлн 773 млрд теңгені, ал 2021 жылы - 340 млрд теңгені құрады. Бұл төмендеу 2021 жылы мемлекеттік аудитпен қамтылған қаражат көлемінің жеті есе азаюымен түсіндіріледі. Тартылатын сыртқы қарыздарды пайдаланудың тиімділігіне қатысты мәселелер де бар. Бүгінгі таңда үкіметтің сыртқы қарыздарының жалпы сомасы 21,4 млрд долларды құрайды. Оның ішінде 775 млн доллар сомасындағы қарыздар жойылды, 4,6 млрд доллар сомасындағы 11 жобаны іске асыру мерзімі ұзартылды», деді Сұлтанбек Мәкежанов.
Заң жобасында сондай-ақ байланыс операторларының сапа стандарттарына, техникалық нормаларға және байланыс қызметтері сапасының көрсеткіштеріне сәйкес келмейтін пайдаланушыларға байланыс қызметтерін көрсеткені үшін жауапкершілігін күшейту көзделеді.
Бұл шара сандық теңсіздікті жоюға, ғаламторға барынша қол жеткізуді және сапалы байланысты қамтамасыз етуге көмектеседі.
Сондай-ақ, құжатта көлік құралын мемлекеттік нөмірсіз немесе жалған мемлекеттік нөмір белгісімен басқарғаны үшін жауапкершілік күшейтіледі.
Бұдан басқа, жоғары немесе жоғары оқу орнынан кейінгі оқу орындары құрылтайшыларының оқуды жалғастыру үшін білім алушыларды ауыстыруды қамтамасыз етпегені және лицензиядан айырылған немесе оның қолданылуы тоқтатылған, сондай-ақ жоғары оқу орны таратылған жағдайда олардың жеке істерін басқа жоғары немесе жоғары оқу орнынан кейінгі оқу орындарына бергені үшін әкімшілік жауаптылығы белгіленеді.
Бұл шара, ең алдымен, білім алушылардың құқықтары мен мүдделерін қорғауға ықпал етеді.
