Алғашқы күні 48 кило салмақтағы Әбиба Әбужақынованың бағы жанды. Жарысты сәтті бастаған ол жартылай финалда сүрінгенімен, үшінші орын үшін Еуропа біріншілігінің қола жүлдегері Сабина Гилязовамен белдесті. Бәсеке басталған бетте ресейлік спортшы ереже бұзғаны үшін татамиден шеттетіліп, қола медаль Әбибаның уысына түсті. Өкінішке қарай, әзірге өзге жерлестеріміз сүреңсіз өнер көрсетуде. Әсіресе біз 81 кило салмақтағы Абылайхан Жұбаназарға айрықша сенім артқан едік. Бастапқы бәсекелерде әлем және Еуропа чемпионы, Еуропа ойындарының қола жүлдегері, командалық сайыстағы Олимпия ойындарының қола жүлдегері, израильдік Саги Муки мен моңғолиялық Болор-Очир Герелтуйиді жеңгенімен ширек финалда құрлық чемпионы, ресейлік Алан Хубецовқа жол берді. Жұбаныш бәсекесінде Николя Шиларады иппонмен ұтты. Бірақ қола медаль үшін тартыста нидерландылық Де Вит Франкоға есе жіберді. Сол секілді 70 кило салмақтағы Зере Бектасқызы да бесінші орынды қанағат тұтты.
