«Биологиялық негіздеме аяқталды. Ғалымдар киік санын реттеудің қажеттілігі бар дегенді айтып отыр. Бұл Жайық популяциясына қатысты болады. Қазір бұл популяцияның саны 800 мың бастан асады десек, соның 10 пайызы, яғни 80 мың бас киік реттеуге жатады», деп жауап берді Мәжілістің пленарлық отырысынан кейін БАҚ өкілдерінің қойған сауалына.
Журналистерге берген жауабында Серікқали Брекешев киік санын реттеу деп ату шарасы айтылып тұрғанын нақтылады.
Сондай-ақ ол киік санын реттеу шаралары популяциялардың санын шектеп ұстау дегенді білдірмейтінін ескертті.
«Оның ішінде кейбір популяциялардың санын көбейту шаралары да көзделген. Реттеу деген киік санын ұстап тұру екенін қайталап айтамын. Реттеу дегеннен кейін белгілі бір нормалар бар екені түсінікті. Бұл қажет шара. Ауыл шаруашылығы жануарларымен қайшылықтар болмау үшін осылай істеу керек. Бүгінгі таңда Батыс Қазақстан облысында киіктер жайылымдарға ғана емес, егін алқаптарына да кіріп жатыр. Сондықтан бір жағынан проблема да бар. Тіпті биологиялық негіздеме бойынша киіктердің оңтайлы саны емін-еркін тірлік кеше алатын көлемге жетуі керек. Осы негіздемелердің аясында реттеу іске асады. Бүгінгі таңда біз 500-ге дейін киікті зерттеу үшін аламыз», деді ведомство басшысы.
Аяна Тоғанбек
