Медицина • 29 Маусым, 2022

Ақ желеңділерге алғыс

103 рет көрсетілді

«Ата-ананың қадірін балалы болғанда білерсің», Ағайынның қадірін жалалы болғанда білерсің» деген қазақ тағы бірде «Денсаулықтың қадірін ауырғанда білерсің» депті. Халық даналығы мектебінің осы сияқты тағылымдық сөздеріне әншейінде өмір ағынына бір түсіп алып, кейде ойлануға да уақыт таба алмай жататын біздер мына қым-қуыт тіршілікте онша назар аудара бермейтініміз де бар. Десек те, өмірдің заңы өзін мойындатпай қоймайды екен.

Коллажды жасаған Қонысбай ШЕЖІМБАЙ, «EQ»

Ауырмайтын адам жоқ. Жуырда біздің де дәрігерлердің алдында бір «домалап» шығуымызға тура келді. Әңгіме Денсаулық сақтау минис­тр­лігінің Алматы қаласында орналасқан Кардио­логия және ішкі аурулар ғылыми-зерттеулер орта­лығы жайында болмақ. Осы орталықта жаны жайсаң ақ желеңді жандардың арқасында жү­рек ауруын емдетіп, жазылып, қатарға қосылған соң, ризашылық сезіммен осы жолдарды жазып отырған жайымыз бар.

1977 жылы құрылған Қазақ кардиология ғылыми-зерттеу институты 2001 жылы Кардио­логия және ішкі аурулар ғылыми-зерттеу институты болып қайта құрылған көп бейінді клиника болды. Мұнда істейтін дәрігерлердің барлығы дерлік өз мамандықтарын жақсы меңгерген майталмандар екен. Институтта елімізде, алыс және жақын шетелдерде білім алған 12 медицина ғылымының докторы, 2 PhD, 24 медицина ғылымының кандидаты, 8 денсаулық сақтау магистрі – барлығы 101 дәрігер жұмыс істейді.

Қазір «Кардиология және ішкі ауру­­лар ҒЗИ» АҚ еліміздің барлық өңірінен ауыр және күрделі аурулары бар пациенттерге жоға­ры білікті, маман­дандырылған, жоғары техно­логиялық, стационарды алмастыратын және амбула­ториялық-емханалық медициналық көмек көрсететін Қазақстандағы кардиологиялық, кар­дио­­хирургиялық және терапевтік қызметтердің көш­басшысы ретінде танымал. Институт 2021 жылы (тамыз) медицина саласындағы халықаралық «Алтын стандарт» саналатын JCJ аккредиттеуінен өтсе, сол жылдың қазан айында институтқа Ұлттық аккредитацияның жоғары санаты берілді.

Институтта жүрек ауруларының барлық түрі бойынша емдеу шаралары жүргізіледі. 188 орын­дық стационарда 2021 жылы 6 971 пациент­ емделіп шықса, 30 085 амбулаторлық қызмет көрсетіліп, күндізгі стационар жағдайында 1 898 пациент ем алған.

Институт ғалымдарының көпшілігі ғылы­ми жұмыстармен айналысып, жүректі емдеу­дің әдістері мен тәсілдерін жетілдіре түсу мәселе­лері­мен шұғылданады. Ғалым-медиктер республи­калық, халықаралық бірнеше ғылыми жобаға қатысады; елімізде, халықаралық деңгейде өтіп жатқан түрлі симпозиумдар мен конференцияларда баяндамалар жасап, зерттеу нәтижелерін скопус журналдарында жариялап жүр.

Ғылыми ізденістердің барысында шетелдік әріптестерімен шығармашылық байланыстар орнаған. Стратегиялық серіктестік шеңберінде институт Томскінің (Ресей) кардиология ғылыми-зерттеу институтымен, В. Алмазов атындағы «Ұлт­тық медициналық зерттеу орталығымен», Ново­сібірдің (Ресей) академик Е.Мешалкин атын­дағы ҰМЗО-мен, Каунастың (Литва) «Дағ­дарыстарды зерттеу орталығымен», Сеул (Корей Республикасы) ұлттық университет госпиталімен, Бэер-Шева (Из­раиль) медицина орталығымен, Милан (Италия) университетінің клиникасымен, т.б. бірсыпыра халықаралық клиникалық орталықтармен, жа­қын және алыс шетел университеттерімен ынты­мақ­тастықта жұмыс істейді. Сондай-ақ Тәжік­станның Денсаулық сақтау министрлігіне қарас­ты Республикалық жүрек-тамыр хирургиясы орта­лығымен, Өзбекстанның академик В.Вахидов атындағы Республикалық мамандандырылған ғылыми-практикалық медициналық орталығымен ынты­мақтастық туралы меморандум жасасқан.

Кардиохирургия бөлімінің меңгерушісі Рүстем Төлеутаев – Ресейдегі ірі медициналық орта­лықтардың біріне саналатын Новосібір медицина институтының түлегі; осында жүрек ауруларынан кандидаттық диссертация қорғаған, қазір еліміздегі жетекші кардиохирургтердің бірі. Р.Төлеутаевтың жетекшілігімен бөлім дәрігерлері екі ғылыми жоба бойынша жүрек ауруларының түрлі проблемаларын жан-жақты зерттеп, оң нәтижелерін күнделікті тәжірибеде қолданып жатыр.

Осы жерде Рүстемнің дәрігерлер әулетінен шық­қандығын айтпай кетуге болмас. Дәрігерлер династиясының басында қазір Нұр-Сұлтан қала­сындағы Онкологиялық орталықтың бас дәрігері болып істейтін Мұхтар Есенжанұлы Төлеутаев тұр. Рүстемнің анасы Гүлнар – кардиолог дәрігер, ағасы Шыңғыс – астанадағы Ұлттық ғылыми-меди­циналық орталықта торакал-хирург (кеуде клеткалары), жұбайы Сәуле педиатр болып жұмыс істейді. Сондай-ақ Рүстемнің әкесі Мұхтармен бір шаңырақтың астында тай-құлындай тебісіп, бірге өскен ағайынды Гүлсара, Гүлнар, Мұхтарғазы, Райхан Төлеутаевтар да шетінен медик. Олардың ба­лалары Әйгерім (клиникалық фармакология), Жа­нар («Медицина» мамандығы бойынша фило­софия докторы), Айғаным (педиатр), Асхат (отоневролог) династияның дәрігерлік дәс­­тү­рін жалғастырса, Гауһар Астана медицина уни­верситетінің жалпы медицина факультетін бітірген.

Емделу барысында жақынырақ танысқан кардиохирургия бөліміндегі күн демей, түн демей, атқарып жатқан жұмыстарына куә болып, бір үйдің адамдарындай тату-тәтті еңбек етіп жатқан дәрігерлерге риза­шылық білдірдік. Адам жанының арашашысы болып, сөзімен де, ісімен де емделушілердің құрметіне бөленіп жүрген дәрігерлердің қай-қайсысы болса да мақтан тұтуға тұрарлық. Солай бола тұра, біз осында жемісті еңбек етіп жатқан ұжымның бірнеше мүшесінің еңбек жолдарымен таныстыра кеткенді жөн көрдік.

Осы бөлімнің кардиологі Гүзел Пархатқызы Ысқақбаева мен кардиохирургы Жанар Нұрбай­қызының өз ісінің нағыз мамандары, емделу­шілердің құрметіне бөленген жандар екендігіне көзіміз жетті.

Г.Ысқақбаева 2011 жылы С.Д.Асфендия­ров атындағы Қазақ ұлттық медицина универси­тетін дәрігерлік іс мамандығы бойынша біті­ріп, интернатураны Қазақ-Ресей медицина уни­­вер­ситетінде тәмамдаған. Осы алғашқы ма­ман­­данудан өтіп, Астана қаласындағы Оқу-кли­­ни­калық орталығында, Ұлттық кардиохирургия орталығында, Новосібірдегі академик Е.Мешалкин атындағы Ұлттық медициналық зерттеу орталығында біліктілігін арттырды. Еңбек жолын 2012 жылы Кардиология және ішкі ауру­лар ғылыми-зерттеу институтында бастаған ол бүгінге дейін осы жерде жемісті еңбек етіп келеді. Қазір осында кардиолог дәрігер болып жұмыс істейді. Клиникалық қызмет атқара жүріп, медицина саласындағы ғылыми жобаларға, клиника­лық зерттеулерге белсене қатысады.

Санкт-Петербург мемлекеттік медицина ака­де­миясының түлегі, еліміздегі «Жүрек, қан және эндокри­нология орталығының» аспирантурасын бітірген, жоғары санатты дәрігер кардиохирург Жанар Нұрбайқызы жастығына қарамастан, өз мамандығының нағыз майталманы десе де боларлық. Түрлі республикалық, халықаралық конференцияларда баяндамалар жасап, шетелдік танымал медициналық орталықтарда, оның ішінде атақты Тель-Авивтегі (Израиль) «Кардиохирургия мен кардиореаблитациядағы жаңа технологиялар» орталығында тағылымдамадан өтіп келген Жанар Нұрбай – жүрек қақпақшаларын ауыстырудың қыр-сырларын жете меңгерген дәрігер. Ол – «Аневризма жағдайындағы аорта мен аорта кла­панын ауыстырудың жаңашыл тәсілдері» ғылыми жобасын орындаушылардың бірі. Отандық, халықаралық ғылыми журналдарда 15-тен астам мақалалары жарық көрген, халықаралық кон­грестерде баяндамалар жасаған.

Кардиология және оңалту бөлімінің меңге­рушісі Әмина Ғалымжанқызы Рақышева Алма­тыдағы С.Д.Асфендияров атындағы Қазақ мем­лекеттік медицина университетін үздік бітірген соң мамандығы бойынша жұмыс істей жүріп, Каунастың медицина университетінде (Литва, 2007), Нагасаки пре­фектурасындағы медицина орталығында (Жапония, 2012) тағылымдамадан өтіп, 2018 жылы жүректің созылмалы ауруларының пайда болуын анықтау жолдары бойынша канди­даттық диссертация қорғаған.

Кардиология және ішкі аурулар ғылыми-зерт­теу институтындағы дәрігерлік этикет, ем алушылармен қарым-қатынастың дұрыс жолға қойылуы кез келген емделушінің жанын жадыратады. Осы жерде Гиппократтың «ауруды дәрігердің дәрісі емес, сөзі емдейді» деген сөзінің шындығына көзіңіз жеткендей болады. Дәрігерлер жасаған түрлі ем-доммен бірге олар айтқан әрбір жылы сөз психологиялық тұрғыдан емделушілердің жүре­гіне тікелей оң әсер етіп, олардың тезірек сауы­ғып кетулеріне барынша оңтайлы жағдай туғызып жатады.

 

Дандай ЫСҚАҚҰЛЫ,

филология ғылымдарының докторы,

профессор

Соңғы жаңалықтар

«Айқайдың» астары

Өнер • Кеше

Байрон ұйығы

Әдебиет • Кеше

Ұқсас жаңалықтар